Корейс драмалари доимо юқори стандартлар асосида ишлаб чиқилиши ва турли жабҳаларни қамраб олиши туфайли бутун дунё бўйлаб мухлисларга эга бўлди. Корейс сериаллари нафақат романтика ва мелодрама, балки жанговар, илмий, фантастика ва бошқа кўплаб жанрларни ўз ичига олади. Қуйида сўнгги йилларда томошабинлар томонидан юқори баҳоланган энг қизиқарли корейс сериалларини ҳавола этамиз.
“Жаҳаннам чорлови” (2021)
Мазкур сериал премьераси 2021 йил 19 ноябрда бўлиб ўтди. Драмада ҳозирги замондаги воқеалар баён қилинади. Сюжетга кўра, барча инсонлар қанча умри қолгани ҳақида ғалати матнли хабарларни қабул қилади. Буларнинг ортидан дўзахдан ташриф буюрган ва ўзи билан гуноҳкор инсонларни олиб кетадиган йиртқич ҳайвонлар пайдо бўлади.
“Севги парвози” (2019-2020)
Сери Юн бадавлат оиланинг меросхўри ва Кореядаги бир қанча таниқли брендларнинг эгаси бўлади. Унинг ҳаёти ташқи томондан идеалдек туюлади, лекин аслида унинг умри даҳшатли тушга ўхшайди. Оиласи билан мураккаб муносабатлар туфайли Сери Юн барча нарсага ўзи эришадиган ва совуққон хонимга айланади.
Кунларнинг бирида қаҳрамон парапланда учиш пайтида Шимолий Кореяга тушиб қолади. Бегона давлат фуқаросини капитан Чон Ҳёк Ри топиб олади. Ҳарбийлар адашиб келиб қолган қизни ҳимоя қилишга ва уни имкон қадар тезроқ ўз ватанига қайтишига ёрдам беришга қарор қилади. Бу орада Сери ва Чон Ҳёк ўзлари билмаган ҳолда бир-бирларини севиб қолади.
“Винчензо” (2021)
Пак Жу Ҳён криминал авторитет Дон Фабионинг асраб олинган ўғлидир. Йигит оила аъзолари билан биргаликда ноқонуний ишларни амалга оширади ва келажакда бу борада ҳеч қандай муаммо юзага келмаслигига ишонади. Аммо жиноий гуруҳ раҳбари вафотидан кейин Фабионинг бошқа ўғли Жу Ҳённи ўлдиришга ҳаракат қилади. Бош қаҳрамон Жанубий Кореяга қочиб кетишга муваффақ бўлади ва у ерда Ҳон Ча Ён билан танишади.
“Итевон синфи” (2020)
Пак Серои — давлат мактаби ўқувчиси бўлиб, мураккаб характери туфайли ўз ҳаётини барбод қилади. У нуфузли шахсларнинг фарзанди билан жанжаллашиб, мактабдан ҳайдалади. Сўнг йигит қамоққа тушади ва бир неча йилдан кейин озод бўлади. Кейинроқ у дўстлари билан биргаликда рақиби Чан Гинвонга қарши туриш учун янги ресторан очади.
“Ёвузлик гули” (2020)
Пек Ҳи Сон бахтли турмуш ўртоқ ва ота бўлади, унинг севимли иши нафақат яхши даромад, балки ҳаётига қувонч ҳам келтиради. У рафиқаси билан ширин қизалоғини вояга етказиш билан машғул бўлади ва ҳаёти доим шундай яхши бўлишини орзу қилади. Аммо унинг аёли Ча Жи Вон навбатдаги тергов ишлари билан шуғулланар экан, эри ўта шафқатсиз қотил билан алоқаси борлигини билиб қолади.
“Гоблин” (2016-2017)
Токкеби тўққиз аср вақт давомида жин шаклида яшаб юради. У бир вақтлар Ким Шин исмли машҳур саркарда бўлган, лекин қирол унинг ҳокимиятга таъсири ва кучидан қўрққани туфайли ҳийла-найранглари билан ҳокимиятни ўз қўлига олиш мақсадида Ким Шин ва унинг барча аскарларини қириб ташлайди. Натижада Кимнинг руҳи лаънатланди ва у Токкебига — ўлмас жинга айланади. Бу ҳолатдан чиқиб кетиш учун Токкеби кўкрагидаги қилични сеҳрли кучга эга инсон олиб ташлаши керак бўлади.
“1988 йилга қайтиб” (2015-2016)
Сериал сюжети Тобонгу ҳудудидаги бир кўчада ўсган дўстлар ҳақидадир. Унда нафақат ёшлар, балки катталар ҳаётида учрайдиган муаммоларга эътибор қаратилган. Бош қаҳрамонлар ўсмирликда бўладиган қийинчиликларни ўтказиши ҳамда вақт ўтиб, улғайишлари керак бўлади.
“Меросхўрлар” (2013)
Машҳур корейс актёрлари иштирокидаги драма ўз вақтида ҳақиқий хитга айланган. Биринчи эпизод чиққанидан саккиз йил ўтганига қарамай, драма Жанубий Кореядаги энг яхши лойиҳалар рўйхатида қолмоқда.
“Меросхўрлар” драмасида ташқи томондан бахтли кўринадиган, лекин аслида уларнинг ҳар бири ота-оналари билан қийин муносабатда бўлган бадавлат мактаб ўқувчилари ҳақида ҳикоя қилинади.
Изоҳ (0)