Халқ орасида “дорама” деб аталадиган корейс ва хитой сериаллари ўзбек томошабинлари орасида анча йиллардан бери оммалашиб келган. Дастлаб “драма” ёки “дорама” атамаси фақат Японияда ишлатилган бўлса, эндиликда ибора Шарқий Осиёдаги ҳар қандай сериал учун қўлланади. Бугун биз сизга энг қизиқарли сюжетга эга тарихий драмаларни кўришни таклиф этамиз.
“Энг гуллаган ёшлик чоғимиз” (Our blooming youth) — 2023
Хитойнинг мазкур тарихий сериали детектив ва фентези элементларини ўз ичига олган. Сюжетга кўра, валиаҳд шаҳзода Ли Хван ўз акасини заҳарлаганликда гумон қилиниб, ўз ўлими ҳақида сирли башорат олади. Бир оз такаббурли характерга эга шаҳзодага номаълум шахслар фитна уюштиради ва у саройдан қочишга қарор қилади. Шунда у ажойиб заковат соҳиби Мин Чже Йи билан учрашиб қолади. Афсуски, олийжаноб қиз ҳам оиласининг қотили сифатида айбланиб, барчадан яшириниб юрган бўлади. Оқибатда улар бир-бирига ёрдам беришга қарор қилади. Мин Чже Йи шаҳзодага қўйилган лаънатни олиб ташлашга ва оиласининг қотилини излаб топишга бел боғлайди.
Драма томошабин учун кутилмаган бурилишлар ва ноодатий сюжетга бойдир. Мин Чже Йи ролини кореялик актриса ва телебошловчи Чон Со Ни, шаҳзода ролини эса актёр Пак Хен Шик ижро этган.
“Шанян ҳақида поэма” (The Rebel princess) — 2021
Гўзал ва латофатли, аммо бир оз мағрур малика Ван Сюан Хитойнинг нуфузли канцлерининг қизи бўлган. У болалигидан чексиз меҳр ва ғамхўрлик билан катта бўлади. Бироқ Сюан балоғатга етгач, отаси ўзининг сиёсий манфаатлари йўлида қизини оддий оила фарзанди — жангчига турмушга беришга қарор қилади. Ёшлар оила қургач, турли хавф-хатарлар ва хиёнатларга тўла йўлни босиб ўтади.
Ван Сюан ролини машҳур актриса, “Гейша хотиралари”, “Учар ханжарлар уйи” фильмлари қаҳрамони Чжан Зйи ўйнаган. Фильмда унинг турмуш ўртоғи, генерал образини актёр Чжоу Ивей (“Тадбиркорлар асри” сериали қаҳрамони) гавдалантирган.
“Император аёл Ки” (Empress Ki) — 2013-2014
Жанубий Кореяда суратга олинган ушбу драма император оиласидан бўлган қизнинг мураккаб тақдири ҳақида ҳикоя қилади. Драмада 14-асрда содир бўлган воқеалар тасвирланади. У вақтда Корея (аввал “Корё” деб аталган) Мўғуллар империясининг вассали бўлган.
Фитна, хиёнат, аёллар ва қулларга нисбатан зўравонлик даврида мўжизавий тарзда омон қолган Ки Син Нян келажакда Осиёнинг энг кучли аёлларидан бирига айланиши ҳақида билмас эди. У болалигида онасидан айрилган ва омон қолиш учун ўзини ўғил бола қилиб кўрсатишга мажбур бўлган. Кўп ўтмай, Корё мустақиллигини йўқотиб, Юаннинг бир қисмига айланади ва Ки Син Нян Мўғуллар империяси ҳукмдорига хизматкорлик қилади. Кейинчалик императорнинг севимли канизагига айланган қиз олдида янги имкониятлар очилади.
Аёл император Ки ролини актриса Ҳа Жи Вон (“Корея”, “Сирли боғ” сериаллари қаҳрамони) ижро этган.
Изоҳ (0)