1990 йилларнинг охири, 2000 йилларнинг бошларида биринчи корейс драмалари кассеталар сотиладиган пештахталарда пайдо бўлган. Ўша даврда Корея кино олами бугунгидек ранг-баранг ва турфа сериалларга бой эмасди. Айнан драмалар орқали бутун дунёдаги кўплаб давлатлар Корея халқи, миллати ва урф-одатларига қизиқиш билдира бошлади. Минглаб одамлар драма дискларини харид қилар, қаҳрамонлар тақдири ҳақида қайғуриб, сериалларни бошидан охиригача дўстлар ёки оила даврасида катта қизиқиш билан томоша қилар эди.
Лойиҳалардаги бош қаҳрамонлар эса бутун дунёга танилиб, ҳақиқий кино юлдузга айланди. Бу даврда ҳинд кинолари даврини Корея драмалари (Ҳаллю) эгаллади.
Корея тўлқини ёки Ҳаллю — бу дунё бўйлаб корейс маданияти, К-поп ва К-драмага бўлган қизиқишнинг ортиб бораётганини билдирувчи тушунча.
Бугун биз аллақачон Корея киносининг классикасига айланган 4 та энг машҳур драмаларни ёдга олишга қарор қилдик.
“Қалбим чечаги”
Жанубий Корея ижодкорлари томонидан тақдим этилган “Қалбим чечаги” сериали қизиқарли сюжет, маҳоратли актёрлар ансамбли ҳамда ёқимли қўшиқлари туфайли дунё томошабинларида корейс сериалларига нисбатан қизиқиш уйғота олган илк драмалардан бўлди.
Драма 1997 йилда суратга олинган бўлиб, унда соддадил ва меҳрибон етим қиз Ли Юн Хи, хонанда бўлишни орзу қиладиган бадавлат тадбиркорнинг ўғли Канг Мин Хи ва мамлакатнинг етакчи мода уйларидан бирининг дизайнери Ли Жун Хи ўртасидаги севги учбурчаги ҳақида ҳикоя қилади.
Сериал саундтреклари эса кўплаб мусиқа шайдоларига манзур бўлди, Ан Че Ук ижросидаги “Forever” қўшиғи бунга яққол мисолдир.
“Қиш сонатаси”
Японияда ва бутун Осиёда айниқса машҳур бўлган ушбу драма ҳақида кўпчилик эшитган бўлиши шубҳасиз. Кўплаб томошабинлар қалбидан жой олган бу сериал энг беғубор севги ҳақида ҳикоя қилади. Икки ёш йигит ва қиз — Жун Санг ва Ю Жин болаликда бир-бирига кўнгил қўяди, бироқ автоҳалокат туфайли Жун Сангни ҳалок бўлди деб ўйлаган Ю Жин уни кўрганида қаттиқ изтироб чекади. Афсуски, хотирасини йўқотган Жун Санг уни танимайди.
Аммо охир-оқибат сериалда севги ғалаба қозонади. Қайта-қайта кўрганда ҳам томошабин қалбини соф, самимий туйғулар тарк этмайди. Ундаги баъзи саҳналар суратга олинган Нами ороли Жанубий Кореянинг энг машҳур сайёҳлик марказларидан бирига айланган.
-5RaiZQvw.jpeg)
Драма намойиш этилгандан сўнг у ерга ташриф буюрувчилар сони бир неча баробар ошди. Меҳмонлар бош қаҳрамонлар сайр қилган хиёбонларни кезиши ёки йўл бўйлаб велосипедда учишлари мумкин. У ерда ҳатто бош қаҳрамонлар Жун Санг ва Ю Жин учун ёдгорлик ҳам ўрнатилган.
Драмада янграган қўшиқлар эса ўша даврнинг машҳур хонандаси Рю томонидан ижро этилган. Сериалда скрипка ва пианинода яратилган гўзал оҳанглар ҳам барча учун таниш. Драмага саундтреклардан бири бўлган “From the Beginning Until Now” бунга яққол мисолдир.
“Сарой жавоҳири”
2003—2004 йилларда намойиш этилган телесериал Жанубий Корея кино саноатида алоҳида ўрин эгаллайди. “Сарой жавоҳири” халқаро ҳитга айланган биринчи тарихий драмалардан бири бўлиб, дунёнинг 90 дан ортиқ мамлакатларида намойиш этилган ва унинг даромади 103 миллион доллардан ошган. Ушбу драма туфайли Эрон, Туркия, Саудия Арабистони, Перу, Колумбия, Миср, Австралия, АҚШ, Янги Зеландия ва Россия каби мамлакатларда корейс анъанавий маданияти ва тарихига қизиқиш янада ортди.
Кўп қисмли сериал реал воқеаларга асосланган бўлиб, Чосон сулоласи подшоҳининг биринчи аёл шифокори бўлишга муваффақ бўлган етим қиз Тан Гем (Ли Ёнг Э) ҳақида ҳикоя қилади. Болалигидан жасур ва қатъиятли қаҳрамон подшоҳни турли дардлардан даволаш учун корейс ошхонаси ва тиббиёти сирларини ўрганади. Мазкур тарихий драмада севги ва дўстлик, хиёнат, мамлакатдаги сиёсий вазиятлар каби турли мавзулар кўтарилади.
Тарихий жанрда фильмлар яратиш аслида ўта мураккаб ишдир, аммо драма ижодкорлари ўтган давр воқеаларини томошабинга етказиб беришнинг уддасидан чиқди. Сериалда Кореянинг гўзал табиати, маҳобатли саройлари, анъанавий ҳанбок номли либослар ва бошқа майда деталлар орқали XV асрга оид давр реалликка яқин тарзда намоён этилган.
Қаҳрамонларнинг нутқларида ҳам қадимги корейс тилига хос бўлган ибораларга дуч келишингиз мумкин, чунки актёрлар ўша давр муҳитини янада яхшироқ ифодалаш учун тарихий услубдаги талаффузни махсус дарсларда ўрганишган.
“Тақдир ўйини”
Профессионал покерчи Жимми Чанинг ҳаётидан илҳомланиб, актёрлар Ли Бён Хун ва Сонг Хе-Кё пул, муваффақият ва севги учун тўқнашадиган қимор ўйинлари дунёси ҳақидаги ҳикояда рол ўйнаган.
Сюжетга кўра, болалигида етим қолган Ким Ин Ха маҳоратли қарта ўйинчиси бўлган амакисининг қўлида тарбияланади. У бадавлат оиланинг ўғли Чве Ён Вон билан қалин дўст тутинади. Кўп ўтмай Ин Ха бир қиз — Мин Су Ён исмли гўзални учратади ва уни севиб қолади. Аммо қизга Ин Ханинг яқин дўсти ҳам бефарқ эмасди.
Ён Вон отасининг ҳийлалари туфайли Ин Ха қотилликда гумон қилинади ва у Америкага қочишга мажбур бўлади. У ерда Ин Ха профессионал покер ўйинчиси сифатида фаолиятини бошлайди ва халқаро муваффақиятларга эришади. Кореяга қайтиб, қаҳрамон севгиси учун собиқ дўсти билан жангга киришади.
Сериал корейс киносининг классикасига айланди ва Корея билан бирга хорижда ҳам машҳурликка эришди. SBS Drama Awards вa Baeksang Arts Awards мукофотларини қўлга киритди. Ли Бён Хунга “Энг яхши телевидение актёри” унвони берилди.
Изоҳ (0)