Кинолокациялар: корейс сериаллари тез-тез суратга олинадиган машҳур жойлар

Жанубий Корея — тарих ва маданият чамбарчас боғланган, қадимий бинолар ва табиатининг гўзалликлари кўплаб корейс сериаллари учун декорацияга айланган мамлакатдир. Бу жойлар нафақат бутун дунёдан сайёҳларни ўзига жалб этади, балки тарихий сюжетларни яратишда муҳим жойга ҳам айланади.

Гёнбокгун саройи (Сеул)

1395 йилда барпо этилган бу сарой Корея монархиясининг улуғворлиги рамзи ҳисобланади. Гёнбокгун нафақат ҳукмдорлар қароргоҳи вазифасини бажарган, балки корейс тарихий сериалларини суратга олиш жойи ҳам бўлган. Унинг ҳашаматли меъморчилиги ва гўзал боғларини “Қироллик” ва “Жекпот” каби фильмларида кўриш мумкин, бу ерда сарой тарихий воқеаларнинг марказий ўрнини эгаллайди.

Букчон Ханок қишлоғи (Сеул)

Букчон кўчаларида анъанавий корейс уйлари — ҳаноклар сақланиб қолган бўлиб, уларда қадимги давр руҳини ҳис этиш мумкин. Бу ердаги ҳар бир иншоот Чосон сулоласи тарихини ўзида мужассам этган. Томошабинлар бу қишлоқни “Токкеби” ва “Дел Луна меҳмонхонаси” сериалларда кўришлари мумкин.

Чхандоккун саройи (Сеул)

XV аср бошларида қурилган бу саройнинг улуғворлиги, бугунги кунгача яхши сақланиб қолгани кишини ҳайратга солади. Қирол оиласи бу ерда вақт ўтказишни ёқтиргани сабабли мажмуа “Қизил манжет” ва “Қирол севгиси” каби дорамаларнинг асосий саҳнасига айланган. Унинг гўзал боғлари ва шийпонлари эса мукаммал суратга олиш майдони ҳисобланади.

Буюк Чан Гим боғи (Кёнгидо)

Ўтмиш муҳитини қайта яратган бу боғ тарихий сериалларда тез-тез кўзга ташланади. Унинг табиий манзаралари ва меъморий унсурлари “Қиролича Чорин” ва “Ой бағридаги Қуёш” каби сериаллар учун идеал локацияни таъминлайди.

Минсок қишлоғи (Кёнгидо)

Чосон сулоласи авлодларининг анъанавий турмуш тарзи ва маданий урф-одатларини кўриш мумкин бўлган, маҳаллий фолклор билан суғорилган корейс қишлоғи. Бу жой нафақат сайёҳлик учун, балки кино суратга олиш учун ҳам қулай. Бу ерда “Ой бағридаги Қуёш” сериали тасвирга олинган. Қишлоқда тарихий воқеаларнинг жонли намойишлари, шунингдек, халқ байрамлари ва маросимлари ўтказилади.

Сувон қалъаси (Кёнгидо)

XVIII асрда қурилган Сувон қалъаси босқинчилардан ҳимоя вазифасини ўтаган ва ЮНЕСКО нинг Бутунжаҳон мероси рўйхатига киритилган. Бу ерга суратга олиш гуруҳлари ташриф буюриб, “Ой нури” фильми сингари ўз асарларида тарихий урушлар муҳитини акс эттиришга ҳаракат қилади.

Хаҳве қишлоғи (Кёнсан-Пукто)

Манзилгоҳ муҳим маданий ҳудуд ва аҳамиятли тарихий ёдгорлик ҳисобланади. Бу ерга фолклор ва тарих ихлосмандлари, шунингдек, корейс деҳқонларининг ҳақиқий ҳаётини акс эттириш учун “Пачинко” каби сериаллар суратга олиш гуруҳлари ташриф буюради.

Бу ноёб жойлар нафақат сайёҳларни ўзига жалб этади, балки машҳур корейс сериаллари учун жонли саҳнага ҳам айланади. Ушбу меъморий ёдгорликлар томошабинларга ўтмиш руҳини ҳис қилиш имконини беради ва уларни буюк корейс ҳукмдорлари ҳамда озод жангчилар даврига олиб боради.