Голливудни забт этган корейс актёрлари (фото)

Корейс миллатига мансуб қайси актёрлар бутун дунёни, хусусан, Голливудни ҳам забт этгани ҳақида маълумот берамиз.

Ли Бён Хан

Ли Бён Хан 1970 йилда Сеулда туғилган. Унинг отаси бизнесмен, синглиси эса модел ва “Мисс Корея” танлови ғолиби. Хан иккита олий маълумотга эга: филология ва киношунослик. У 1991 йилда Жанубий Корея телесериалида экрандаги дебютини қилган. Америкага кўчишдан олдин у машҳур “Бирлашган хавфсизлик зонаси” (2000) фильмида ҳам рол ўйнаган.

Ватанида энг яхши актёрлардан бирига айланган Ли Бён Хан Ғарбни забт этишга йўл олди ва Голливуднинг “Кобра ҳамласи” (2009), “Г.И. Жо: Кобра ҳамласи-2” (2013), “Терминатор: Генезис” (2015) фильмларида рол ўйнади. Унинг бугунги кунга қадар сўнгги муваффақиятли иши Жанубий Кореянинг “Калмар ўйини” (2021) сериалидаги роли бўлди, уни биринчи ойнинг ўзидаёқ 140 миллиондан ортиқ киши томоша қилган, бу эса жаҳон рекордидир.

Арден Лим Чо

Арден Чонинг ота-онаси қизи туғилишидан олдин Техасга кўчиб ўтган. Болалигида у рақс, мусиқа ва драма мактабига боради, лекин олий маълумотни психология соҳасида олади. 2004 йилда Арден “Мисс Чикаго” унвонини қўлга киритади, бу унинг карьерасига тубдан таъсир кўрсатади. Қиз гўзаллик танловида иштирок этиш учун ватани Сеулга боради, аммо эътироф ўрнига ҳақоратлар остида қолади. Бундай хорлик Арден Чонинг руҳини синдира олмайди. Қиз Америкага қайтиб, модел сифатида ишлашни давом эттиради. У Nike, Apple, Alexander МcQueen ва Vogue журнали каби брендлар учун суратга тушган.

2016 йилда Арден “Бўри боласи” телесериалида Кира Юкимура ролига тасдиқланади. Бу роль унга бутун дунё бўйлаб машҳурлик келтиради, мазкур сериал ҳали ҳам рейтингларда етакчи ўринларда.

Сон Кан

Ўсмирлик чоғида Грузияда ўсган Кан мим (пантомима актёри) бўлишни орзу қилган, аммо Сон ҳуқуқшунослик йўналишида ўқийди ва Лос Анжелесга кўчиб ўтади. У ерда официант бўлиб ишлайди, шу билан бирга кастингларга боради. “Перл-Ҳарбор” драматик фильмидаги эпизодик роли уни дунёга танитади, шундан сўнг Кан “Ўлим 4.0” (2007) ва “Уруш” (2007) фильмларида Жейсон Стейтем ва Брюс Уиллис билан биргаликда рол ўйнайди.

Сон Кан, шунингдек, “Голливуд саргузаштлари” (2015), “Чегарасизлар” (2010) каби фильмларда суратга тушган. “Форсаж” фильмидаги образи актёрга дунё миқёсида машҳурлик келтиради.

Ким Дениел Де

Дениел Де Ким — келиб чиқиши кореялик бўлган америкалик актёр ва продюсер. Унинг биринчи асарлари орасида “Нью Йорк полицияси” (1993), “Юлдузли йўл” (1995), “Сайнфелд” (1998), “CSI: Жиноят жойи” (2000), “Қалқон” (2002) каби лойиҳалар бор. 2003 йилда у “Халк” фильмида, 2004 йилда эса “Ўргимчак одам-2” фильмида иштирок этган. 2004 йилдан 2010 йилгача у “Ҳаёт-мамот” сериалида рол ўйнаган. Жин Квон роли Кимнинг карьерасидаги энг муваффақиятли асарлардан бирига айланди ва уни бутун дунёга танитди. Айнан шу роли учун у Screen Actors Guild Award, АЗН Asian Excellence Award, Multicultural Prism Award, Vanguard ва бошқа кўплаб мукофотларга сазовор бўлди.

Дениел, шунингдек, “Дивергент 2-боб: Исёнчи” (2015) ва “Дивергент 3-боб: Девор ортида” (2016) фильмларида фракция раҳбари ролини ўйнаган.

Ким иштирокидаги сўнгги лойиҳалар “Ғаройиб доктор” (2017) ва “Ҳеллбой” (2019) ҳам юқори баҳоларга сазовор бўлди.

Никол Билдербек

Николь Билдербек — бутун дунёга машҳур, мураккаб тақдирга эга қиз. У Сеулда туғилган, лекин Техасда катта бўлган. Николни америкалик Жим ва Лоис Билдербеклар асраб олишган. Никки болалигидан рақсга тушишни яхши кўрарди ва ота-онаси истеъдодли фарзандини юборган Ёш актёрлар студиясида унинг деярли барча рақс турларини ўзлаштиради.

1993 йилда Николь ўрта мактабни тугатиб, актёрлик фаолиятини бошлаш учун Лос Анжелесга кўчиб ўтишга қарор қилади. Николь телесериалларда эпизодик ролларни ўйнайди. 2001 йилда Билдербек KoreAm Journal ва Yolk журналларининг муқоваларида пайдо бўлиб, модел сифатида ишлай бошлайди.

2005 йилдан Николь Голливуд фильмларида фаол иштирок эта бошлайди. “Суяклар” (2005), “Касл” (2009), “Менталист” 92008), “Яхши қизлар” (2018) телесериалларидаги роллари унга дунё миқёсида машҳурлик келтиради.