Жанубий Корея телесериаллари ва фильмлари юлдузлари нафақат ўз ватанида, балки хорижда ҳам истеъдоди ва жозибали кўриниши туфайли катта машҳурликка эришган. Бирор нуқсонсиз чеҳраси, жуда ёш кўриниши, нафис ҳаракатлари ва кулгили образлари корейс актрисалари учун шарқона гўзалликнинг ажралмас элементи бўлиб қолган. Қуйида ўзининг ноёб харизмаси, фильмлардаги ажойиб чиқишлари ва гўзаллиги билан кино саноатида муваффақият қозонган корейс актрисалари ҳақида сўз юритамиз.
Пак Шин Ҳе
Пак Шин Хе нафақат Жанубий Кореяда, балки бутун Осиёда энг машҳур актрисалардан биридир. 34 ёшли актриса машҳур “Ворислар”, “Докторлар” сериалида бош ролни ўйнаган. Шин Хе 19 ёшида рол ўйнаган “Сен гўзалсан!” сериали туфайли машҳур бўлиб кетади. Бундан ташқари, Шин Хе муваффақиятли қўшиқчи бўлиб, иккита альбоми яратган.
Актриса Forbes Коrеа Power’нинг машҳурлар рўйхатида 33-ўринни эгаллайди. Томошабинларни доим ўзига қарата олиш қобилияти туфайли у “Корейс драмаси гўзали” унвонига сазовор бўлган. Пар ижтимоий лойиҳалар ва фильмларда фаол иштирок этмоқда ва унинг халқаро миқёсдаги машҳурлиги ўсишда давом этмоқда.
Сон Ҳе Гё
Корейс драмалари юлдузи Сон Ҳе Гё нафақат Кореяда, балки бутун дунёда гўзаллик тимсолига айланган. У “Куз эртаги”, “Тақдир ўйини”, “Оила”, “Бу қишда шамол эсади”, “Қуёш авлодлари” сериалидаги бош роллари билан танилган. Актриса “Куз эртаги” фильмидаги роли учун SBS Drаmа Awards’да “Энг яхши актриса” ва “Baeksang Arts” мукофотини қўлга киритган. 2022 йилда эса у “Машҳурлик” телесериалида рол ўйнагач, Кореянинг етакчи актрисаларидан бири сифатидаги мақомини мустаҳкамлаган.
Лим Су Чжон
Лим Су Чжон ўзининг катта ва профессионал тажрибасига эга машҳур актриса. Унинг ролларга ўзига хос ёндашуви уни халқаро саҳнадаги энг жозибали актрисалардан бирига айлантирган. Актриса “Сеулдаги бедорлар”, “Мен киборгман, лекин бу нормал”, “Меланхолия”, “Мактаб”, "Кечир, аммо сени севаман” каби фильм ва сериаллардаги роллари билан шуҳрат қозонган.
Лим Су Чжон “Рафиқам ҳақида барча ҳақиқат” фильмидаги иштироки учун “Мовий аждаҳо” мукофотининг “Энг яхши аёл роли” номинациясида ғолиб бўлган.
Ли Чжи Ин (Аю)
Аю тахаллуси билан танилган Ли Чжи Ин 31 ёшли хонанда ва актриса бўлиб, мусиқий карьерасини 15 ёшида “Lost and Found” дебют альбоми билан бошлаган. У Жанубий Кореянинг йирик Mnet Asian Music Awards маросимида бир нечта мусиқий мукофотларга сазовор бўлган. Ли Чжи Ин ўзининг мусиқий ва актёрлик карьерасини муваффақиятли бирлаштира олган. Сўнгги йилларда у бош ролни ўйнаган “Алвон Корё”, “Менинг жанобим” телесериали туфайли унинг машҳурлиги сезиларли даражада ошди.
Аю актрисалик фаолиятини 2011 йилда бошлаган. У “Орзу”, “Ўртакашлар”, “Қирмизи юрак”, “Продюсерлар” каби фильм ва сериалларда рол ўйнаган.
Пе Су Жи
2010 йилдан 2017 йилга қадар Пе Су Жи машҳур “Мисс А” гуруҳининг аъзоси сифатида фаолият юритган, аммо номаълум сабабларга кўра К-поп қизлар гуруҳи тарқалиб кетган. Шундан сўнг Су Жи фильмларда рол ўйнашни ва телевидениеда чиқишни бошлаган. Актриса “Юлдузлардан келган одам”, “Токи уйқуда экансиз”, “Телба ошиқлар” каби драмаларидаги роллари билан томошабинлар ёдида қолган.
“Гу оиласи ҳақиқда китоб” тарихий сериали Пе Су Жи карьерасидаги ҳақиқий ютуқ бўлди: мазкур рол унга Forbes Power Celebrity 40 рейтингида учинчи ўринга чиқишига сабаб бўлди. Су Жининг мухлислари унинг она шаҳрида актриса номидаги кичик музейни ташкил қилишган.
Юн Ю Чжун
Ушбу актриса корейс кино ва театрида кўп йиллик тажрибага эга. У 1947 йил 19 июлда Жанубий Кореяда туғилган. Юн Ю Чжун ўзининг карьерасини 1970 йилларда бошлаган ва тез орада Кореянинг энг машҳур ва таниқли актрисаларидан бирига айланган. У асосан драма ва комедиялардаги кўплаб роллари билан танилган. 2021 йилда у “Минари” фильмидаги роли билан халқаро муваффақиятга эришди ва Оскар мукофотининг “Энг яхши актриса” номинациясида ғолиб бўлди. Бу унинг карьерасидаги энг йирик ютуқлардан бири бўлди. Шунингдек, Ю Чжун Америка актёрлари гилдияси, Британия Академияси Фильм мукофотларини ҳам олган.
У “Олов аёл”, “Оқсоч”, “Эримнинг оиласи пайдо бўлди”, “Пачинко” каби лойиҳалари билан танилган.
Изоҳ (0)