Қизиқарли сюжети билан ҳар қандай Голливуд фильмларини ортда қолдирадиган чет эл сериаллари

Дунё бўйлаб машҳур ва қизиқарли сериалларни томоша қилишни тавсия қиламиз. Корейс драмаларидан тортиб, ҳаяжонли испан триллерларигача — бу фильмлар ажойиб ҳикоялар чегара билмаслигини исботлайди.

“Қоғоз уй”, Испания (2017—2021)

Жиноят раҳбари инсоният тарихидаги энг катта талончиликни режалаштирган — Испания Қироллик зарбхонасига кириб, миллиардлаб евроларни босиб чиқариш. Сериал Алекс Пина томонидан яратилган ва дастлаб маҳаллий телевидениеда намойиш этилган.

Сериал тизимли адолатсизликка қаршилик ва эркинлик истаги ҳақида мавзуларни кўтаради.

“3%”, Бразилия (2016—2020)

Сериал воқеалари одамларнинг бой ва камбағалларга қатъий бўлинган келажакда содир бўлади. Йигирма ёшида ҳар бир киши бир қатор махсус тестлар орқали бойлар қаторига кириш имкониятига эга бўлади. Синовлардан сўнг фақат 3% танланганлар рўйхатига киради ва яхшироқ ҳаёт кечириш учун кетади.

Режиссёри Педро Агилеранинг ушбу сериалдаги мақсади тенгсизлик ҳақидаги мунозаралар кучайиб бораётган бир пайтда бутун дунёда акс-садо бераётган замонавий Бразилияда юзага келган кескин ижтимоий-иқтисодий тенгсизликларни кўрсатиш эди.

“Зулмат”, Германия (2017—2020)

Воқеалар Германия шаҳарчасида бўлиб ўтади — икки нафар боланинг ғойиб бўлиши тўрт оиланинг қора сирларини кўтаради. Фильм Баран бо Одар ва Янте Фриз томонидан яратилган. “Зулмат” ўзининг ноодатий ва мураккаб ҳикоялари билан машҳур бўлди.

Сюжет нуқтайи назаридан ижодкорлар инсониятнинг экзистенсиал қўрқувлари ва фалсафий саволларига чуқурроқ кириб боришга ҳаракат қилган.

“Фауда”, ​​Исроил (2015—2022)

Сюжет марказида фаластинлик жангарини қўлга олиш учун чиққан нафақадаги исроиллик агент туради. Душманини ўлдирганига ишонган бош қаҳрамон ўзини бошқа бировнинг ҳийласига алданганини тушунади.

Исроил-Фаластин можаросининг мураккабликларини ўрганувчи, ҳар икки томоннинг истиқболларини кўрсатадиган Исроилда баҳсли, аммо жуда машҳур фильм. “Фауда” халқаро эътиборни тортди ва ҳарбий можаро ҳамда унинг оқибатларини ҳақидаги мунозараларга сабаб бўлди.

“Ҳукумат”, Дания (2010—2022)

Драматик сериал ҳамма учун (жумладан, ўзи ҳам) кутилмаганда бош вазир бўлган партия етакчиси ҳақида ҳикоя қилади. Фильмда ҳокимият ва сиёсий амбицияларнинг одамларни қандай ўзгартириши кўрсатилади — сериалда Даниядаги сиёсий ҳаётнинг барча нозик томонларини очиб бган.

Сериал нафақат Данияда, балки бутун дунёда танқидий эътирофга сазовор бўлиб, кескин сиёсий шарҳи ва жамоат ҳамда шахсий ҳаёт ўртасидаги зиддиятни чиройли тасвирлаши, шунингдек, ОАВнинг одамлар фикрига таъсир қилишини намойиш эта олгани билан машҳур бўлди.

“Люпин”, Франция (2021—2023)

Сериал Морис Лебланнинг асарларидаги “жаноб қароқчи” Арсен Люпиннинг саргузаштларидан илҳомланган. Сюжет марказида отасидан қасос олиш учун ўзининг ажойиб харизмаси, ўғрилик маҳорати, айёрлиги ва ниқобланиш санъатидан фойдаланадиган Ассан Диоп туради. Леблан асарларининг замонавий талқини Жорж Кай ва Франсуа Юзан томонидан яратилган.

“Гоморра”, Италия (2014—2021)

Сериал неаполитан жиноий синдикатининг оғир ҳақиқати ҳақида ҳикоя қилади ва сюжет журналист Роберто Савианонинг шу номдаги китобига асосланган. Муаллиф Каморра мафиясининг реал ва ёқимсиз портретини яратади.

“Гоморра” нафақат Италияда, балки бутун дунёда ўзининг ҳақиқийлиги ва ҳаяжонли сюжети туфайли машҳур бўлди. Серия бугунги кунгача уюшган жиноятчиликка қарши курашда ҳал этилмаган муаммоларни ишончли тарзда намойиш этди ва Италия сиёсатига ҳам, жамоатчилик фикрига ҳам таъсир қилди.

“Калмар ўйини”, Жанубий Корея (2021—…)

Ўйин иштирокчилари болалар ўйинларида бир-бирлари билан рақобатлашади. Мағлубиятга учраганлар ўлади ва ғолиб пул мукофотини олади. “Калмар ўйини” 2,205 миллиард соат томоша қилинган Netflixнинг бугунги кунгача энг кўп томоша қилинган сериали бўлиб қолмоқда.

Сериалда капитализм ва унинг ишчилар синфи орасида яратган умидсизлик даражаси танқид қилинади. “Калмар ўйини” ижтимоий тенгсизлик ҳақида глобал мунозараларга сабаб бўлди ва таниқли либослари ҳамда тўпламлари туфайли поп маданиятида мустаҳкам ўрин олди. Иккинчи мавсум Netflixъда бу йил премьераси бўлиши кутилмоқда.

“Элита”, Испания (2018—2024)

Оддий ишчи оилалардан бўлган уч ўсмир энг бадавлат ота-оналарнинг фарзандлари ўқийдиган нуфузли испан мактабига ўқишга киришади. Янги келганлар ва маҳаллий талабалар ўртасидаги тўқнашув кўплаб низоларни келтириб чиқаради, бу ҳатто қотилликка олиб келади.

“Элита” тезда Испанияда машҳурликка эришди ва провокацион мавзулари ҳамда таъсирчан ҳикоялари туфайли халқаро ҳитга айланди. Сериал сир ва ўсмирлар драмасини бирлаштириб, синфий тенгсизлик ва ўзликни излаш мавзуларини кўтаради.

“Рита”, Дания (2012—2020)

Сюжет марказида шахсий ва касбий қийинчиликларга дуч келадиган мустақил ва тўғрисўз мактаб ўқитувчиси туради. Муаммоларни ҳал қилиш учун у кўпинча ноаниқ ва ноанъанавий усулларга мурожаат қилади. Кристиан Торп томонидан яратилган сериал таълим тизими ва шахсий қийинчиликларга бўлган очиқ нигоҳи билан ажралиб туради.

“Рита” жуда жиддий мавзуларни очишда ўткир диалоглар ва ажойиб ҳазилга бой драма бўлгани туфайли Данияда машҳурликка эришган.

“Уят”, Норвегия (2015—2017)

Биринчи муҳаббатидан бошлаб битирув оқшомига тайёргарлик кўришгача бўлган муқаррар ўсмирлик муаммоларига дуч келадиган ослолик беш нафар ўқувчи қизларнинг кундалик ҳаёти ҳақидаги реал ва таъсирчан сериал.

“Уят” ўсмирлар ҳаёти ҳақида ҳаққоний ва реалистик тасаввур беради. Норвегияда мазкур сериал бир нечта халқаро ремейкларни яратишга илҳомлантирди, уларнинг ҳар бири оригиналининг форматини маҳаллий маданият ва долзарб ижтимоий муаммоларга мослаштирди.