Birinchi qismidanoq qiziqtira oladi: kutilmagan syujetga ega 7 ta koreys dramasi

Koreys dramalari nafaqat romantik hikoyalari, balki murakkab syujetli detektivlar, psixologik triller va kutilmagan burilishlarga ega hikoyalari bilan ham ajralib turadi. Birinchi qismidanoq qiziqtirib qo‘yadigan va oxirigacha zavq bilan tomosha qilinadigan seriallarni izlayotgan drama ixlosmandlari uchun quyida eng sara seriallar ro‘yxatini keltiramiz.

“Yovuzlik guli”

Pek Xi Son bir qarashda eng yaxshi turmush o‘rtoq, g‘amxo‘r va mehribon ota hamda o‘z oilasiga sadoqatli shaxsdek ko‘rinadi. Ammo uning o‘tmishi bilan bog‘liq dahshatli siri bor: Pek o‘zining aslida kim ekanligini barchadan yashiradi. Uning rafiqasi Chxa Jchi Von esa detektiv bo‘lib ishlaydi va kasb taqozosi bilan bir qator qotilliklarni o‘rgana boshlaydi, uning so‘nggi topshiriqlari esa hayratlanarli sirlarning ochilishiga sabab bo‘ladi.

Mazkur drama so‘nggi yillardagi eng qiziqarli va dramatik koreys seriallaridan biridir. Loyiha detektiv hikoyalar va psixologik trillerlarni yaxshi ko‘radiganlar uchun ayni muddao bo‘ladi.

“O‘lim o‘yini”

Drama xuddi shu nomdagi veb-tun (webtoon — Janubiy Koreyada paydo bo‘lgan va asosan smartfonlarda o‘qish uchun mo‘ljallangan raqamli komikslar turi) asosida yaratilgan bo‘lib, hayotda beriladigan ikkinchi imkoniyat, taqdir va adolat haqida hikoya qiladi. Bosh qahramon Chxve I Chje hayotda bir qator muvaffaqiyatsizliklarni boshdan kechiradi: u ishsiz qoladi, kelajagida hech qanday istiqbol ko‘rmaydi va bu uchun atrofidagilar uni doim ayblab, tanqid qiladi. So‘ng bosh qahramon umidsizlikka tushib, o‘z joniga qasd qilishga qaror qiladi.

Ammo uning oldida O‘lim ismli sirli ayol paydo bo‘ladi. Ayol Chxveni shafqatsiz “o‘yin”ga jo‘natib, o‘z joniga qasd qilishga uringani uchun uni jazolaydi: Chxve I Chje tez orada o‘lishi kerak bo‘lgan turli odamlarning tanasida 12 marta reinkarnatsiya qilinadi va har safar u o‘limdan qochish imkoniyatiga ega bo‘ladi. O‘zining reinkarnatsiya jarayonida qahramon qayta tug‘ilgan odamlarning hayot sirlarini o‘rganadi, o‘z o‘tmishini qayta ko‘rib chiqishni boshlaydi va taqdirini o‘zgartirish imkoniyati doim borligini anglab yetadi.

“Vinchentso”

Bosh qahramon Vinchentso Kassano (Son Jun Gi) bolaligida asrab olingan va Italiyaga ketgan bo‘ladi. U italyan mafiya oilasida o‘sib, professional advokat va strateg bo‘lib yetishadi. Mafiyalar orasida bo‘lib o‘tgan mojarolar va janjallardan so‘ng, u Janubiy Koreyaga qaytishga majbur bo‘ladi. Vatanida u adolatsizlikka qarshi kurashadi va jinoyatchilardan qasos olish uchun o‘z usullaridan foydalanadi.

U yerdagi mahalliy advokat Xong Cha Yon bilan hamkorlik qilib, korrupsiyaga botgan yirik kompaniya — unga tegishli oltinlar saqlanadigan binoni qaytarib olish uchun kurashadi.

“Iblis ismingni chaqirganda”

Bosh qahramon Xa Rip (Chon Gen Xo) muvaffaqiyatli va mashhur bastakor, ammo uning barcha yutuqlari ortida shayton bilan kelishuv turadi. Ko‘p yillar avval u shon-shuhrat, pul va muvaffaqiyat uchun o‘z jonini shaytonga sotgan bo‘ladi. So‘ng shartnoma muddati tugash arafasida Mo Te Kan (Pak Son Un) ko‘rinishidagi iblis uning ruhini olib ketishga keladi.

Umrini uzaytirmoqchi bo‘lgan Xa Rip muvaffaqiyatining sababchisi aslida yosh bastakor Li Genning (Li Sol) iste’dodini o‘g‘irlash ekanligini bilib oladi. Qahramon aybini yuvishga urinib, unga yordam bera boshlaydi va bu jarayonda nomoddiy narsalar — muhabbat, do‘stlik va samimiylik pul va mashhurlikdan muhimroq ekanini tushunib yetadi.

 “Shaytoniy sudya”

Serialdagi voqealar Janubiy Koreya iqtisodiy va siyosiy inqiroz girdobiga tushgan davrda bo‘lib o‘tadi. Hukumat sud tizimini isloh qilish uchun jonli efirda o‘tkaziladigan ommaviy sud jarayonlarini yo‘lga qo‘yadi.

Bosh qahramon Kan Yo Han (Ji Sun) mashhur sudya bo‘lib, jinoyatchilarni shafqatsiz tarzda jazolashi bilan taniladi. Uning sud zalidagi qarorlari teatr sahnasiga o‘xshab ketadi va u o‘zini “Shaytoniy sudya” deb ataydi. Biroq u haqiqatan ham adolat uchun kurashyaptimi yoki shaxsiy maqsadlarini yashirincha amalga oshiryaptimi, bu savol tomoshabinlarni o‘ylantirib qo‘yadi. Sudya deyarli har bir epizodda yangi munozarali ishlarni ko‘rib chiqadi.

“Aylana”

Serialdagi voqealar ikkita zamonda sodir bo‘ladi: 2017-yil va 2037-yil. Ushbu ikki dunyo bir-biri bilan bog‘langan bo‘lib, sirli hodisalar va texnologik o‘zgarishlar natijasida rivojlanadi.

2017-yil: Kim Vu Jin va uning akasi sirli hodisalar va g‘oyib bo‘lgan insonlarning sababini tekshirayotgan paytda bu ishlarning ortida begona mavjudotlar yoki ilg‘or texnologiyalar borligini tushunib yetadi.

2037-yil: Janubiy Koreya ikkiga: Yorug‘ shahar va Oddiy dunyoga bo‘lingan. Yorug‘ shahar mukammal texnologiyalar bilan boshqariladi va barcha insonlar unda tinch, xotirjam hayot kechiradi. Ammo detektiv Jun Hyok bu ideal dunyo ortida ayanchli haqiqat borligini biladi va uni barchaga fosh qilishga harakat qiladi.

“Sichqon”

Li Sing Gi bosh rolidagi mazkur psixologik trillerda tabiat va tarbiya mavzulari ko‘tariladi: unda seriyali qotillar shunday tug‘iladimi yoki hayoti davomida qotilga aylanadimi, degan savol o‘rtaga tashlanadi.

Detektiv Chon Ba Rim (Li Sin Gi) shafqatsiz seriyali qotilga duch kelmaguncha halol hayot kechiradi. Ammo uning qonida psixopatlarga xos gen bo‘lishi mumkinligini bilgach, uning hayoti tubdan o‘zgaradi.