АҚШ президенти Дональд Трамп Associated Press агентлиги мухбирига Оқ уйга киришни тақиқлади. Бунга сабаб таҳририят президентнинг янги фармонида талаб қилинганидек, “Мексика кўрфази” ўрнига “Америка кўрфази” номини ишлатишдан бош тортгани бўлди.
AP бош муҳаррири Жули Пейс агентлик огоҳлантириш олгани ҳақида маълум қилди. Унга кўра, агар нашр ўзининг таҳририят меъёрларини президент фармонига мувофиқлаштирмаса, уларнинг мухбирига Оқ уйдаги тадбирларни ёритиш тақиқланади. Шу муносабат билан журналист ҳақиқатан ҳам Овал кабинетда Трампнинг навбатдаги фармонини имзолаш маросимига киритилмади.
AP’нинг кириш ҳуқуқини бизнинг таҳририят сиёсатимиз туфайли чеклаш нафақат мустақил журналистикага аралашиш, балки АҚШ Конституциясига киритилган биринчи тузатишни тўғридан тўғри бузишдир, дея таъкидлади Пейс ва бу вазиятни матбуот учун “хавотирли сигнал” деб атади.
Изоҳ (0)