АҚШда Исроилга қарши бойкот ва санкцияларни тақиқлашни назарда тутувчи “Исроил содиқлик тести” қонуни кенг тарқалмоқда. Бу ҳақда америкалик РТ телеканали журналисти Рик Санчез маълум қилди.
Аллақачон 26 та штат ушбу қонунни қабул қилган бўлса, яна 13 та штатда у кўриб чиқилмоқда. Бу яқин орада АҚШнинг ярми ушбу қонунларга амал қилишини англатади. Журналист томонидан харитада кўрсатилган оч кўк рангда Исроилга қарши бойкот ва танқид қилиш эркинлигига эга бўлган 11 та штат кўрсатилган.
Қизиқарли жиҳати шундаки, АҚШда бунгача ҳеч бир давлатга нисбатан шу каби қонун қабул қилинмаган. Ҳатто Қўшма Штатларни қоралаш, бойкот қилиш ёки АҚШга иқтисодий зарар етказадиган ғояларни тарғиб қилишни тақиқловчи қонун ҳам мавжуд эмас. Бироқ, Исроилга нисбатан шундай ҳаракатларни амалга оширишни ман этувчи қонун бор.
Юқоридаги қонунни қўллаб-қувватловчилар у Исроилнинг иқтисодий манфаатларини ҳимоя қилишда зарур эканини таъкидлайди. Танқидчилари эса сўз эркинлиги ҳуқуқларини бузиш деб ҳисоблайди. Шу ўринда “Исроил манфаатларини ҳимоя қилиш, АҚШ фуқароларининг исталган мамлакатни, жумладан Исроилни, танқид ёки бойкот қилиш ҳуқуқларидан устун бўлиши керакми?”, деган савол туғилади.
Исроилни танқид қилишни тақиқловчи штатлар сони кўпайиши АҚШда чет давлатларнинг сиёсатга таъсири янги ҳуқуқий масалаларни келтириб чиқараётганини кўрсатмоқда.
Ҳозирда бу қонунга судлар қандай жавоб беришини номаълум. Аммо қонун қабул қилинган штатларда Исроилга қарши ҳаракатлар учун фуқаролар жазоланиши мумкин.
Трампнинг Исроилга нисбатан сиёсати
♦ Исроил учун 2000 фунтлик бомбалар
АҚШ президенти Дональд Трамп қайта президентликка киришганидан кейин Исроил билан алоқаларини янада мустаҳкамлади. У собиқ президент Жо Байденнинг 2024 йил майидан буён оғир қуроллар етказиб беришга қўйган тақиқини бекор қилди. Оқибатда 9 ойлик танаффусдан кейин АҚШдан Исроилга 907 килоли МК-84 бомбалар партияси етиб келди.
Уруш бошланганидан бери Исроилга 76 минг тоннадан ортиқ ҳарбий техника етказиб берилди. Бу мамлакат тарихидаги энг йирик ҳаво ва денгиз орқали қурол-яроғ етказиб бериш операцияси бўлди.
♦ Фаластинни қўллаб-қувватлаганлар депортация қилинади
Трамп антисемитизмга қарши кураш тўғрисидаги фармонни имзолаши кутилмоқда. У Фаластинни қўллаб-қувватлаб намойишга чиққан хорижликлар, шу жумладан, талабалар учун визаларни бекор қилишни назарда тутади.
Бундан ташқари, у “америкалик яҳудийларга нисбатан террорчилик таҳдиди, ўт қўйиш, вандализм ва зўравонлик” учун жавобгар бўлган барча шахсларни таъқиб қилишга ваъда берди. У президентликка номзодлик даврида ҳам ҲАМАСни қўллаб-қувватловчи талабаларни депортация қилишга чақирганди.
♦ Ғазодаги фаластинликларни кўчириш
Трамп Исроил ўз ҳудудини Ғарбий Соҳил ва Фаластин ҳисобига кенгайтиришига шама қилди. АҚШ президенти Исроил минтақа давлатларига нисбатан гўёки жуда кичиклигини айтиб, “бу яхши эмаслигини” таъкидлади.
Ғазони сотиб олиш ва унга эгалик қилишга қарор қилдим. Қайта тиклаш масаласига келсак, биз уни Яқин Шарқдаги бошқа давлатларга топширишимиз мумкин, улар алоҳида қисмларни қайта қуришлари учун ёки бошқалар бизнинг ҳомийлигимиз остида буни амалга ошириши мумкин, деганди АҚШ президенти.
У ҲАМАСнинг ҳудудга қайтишига йўл қўймаслик учун АҚШ Ғазо секторини ўз назоратида сақлаб туришга мажбурлигини таъкидлаган. Араб давлатлари эса Трампнинг режасини қоралаганди.
Изоҳ (0)