Шуҳрат Қурбонов “Миллий банклараро просессинг маркази” АЖ (Humо) бошқаруви раиси лавозимидан кетди. Бу ҳақда Корпоратив ахборот ягона портали маълумотларидан маълум бўлди.
Унда келтирилишича, Шуҳрат Қурбонов 2025 йил 6 март куни ўз аризасига кўра “Миллий банклараро просессинг маркази” АЖ раҳбарлигидан кетди. 7 март куни унинг ўрнига Алексей Максимов бошқарув раиси лавозимига тайинланди. Алексей Максимов бунгача Octobank АЖ бошқаруви раиси ўринбосари лавозимида фаолият юритиб келаётган эди.
“Миллий банклараро процессинг маркази” — Humо тўлов тизими 2018 йил сентябрь ойида президент қарори билан ташкил этилганди. Шуҳрат Қурбонов Humо тўлов тизимига бевосита ташкил этилганидан буён раҳбарлик қилиб келди. Ҳумо сайтида Шуҳратбек Қурбоновнинг лавозими “бошқарув раиси вазифасини вақтинча бажарувчи” деб кўрсатилган.
2025 йил январида Paynet компанияси Humo тўлов тизимини сотиб олганди. “Миллий банклараро процессинг маркази”нинг 100 фоиз давлат акцияларини сотиш бўйича очиқ савдолар ўтказилганда олтита номзод қатнашишга таклиф қилинган. Улардан 3 нафари белгиланган муддатларда мажбуриятга эга бўлган таклифларни билдирган. 65 миллион АҚШ доллари миқдорида энг юқори харид баҳосини таклиф қилган Paynet АЖ кимошди савдосининг ғолиби деб топилди.
Humo’нинг 100 фоиз давлат улушини сотиш президентнинг 2024 йил 19 апрелдаги қарорида кўзда тутилган эди.
Изоҳ (0)