Тбилиси шаҳар суди Грузия собиқ президенти Михаил Саакашвилини давлат маблағларини ўта йирик миқдорда ўзлаштиришда айбдор деб топди ва уни тўққиз йилга озодликдан маҳрум қилди.
Судья Бадри Кочламазашвилининг сўзларига кўра, ушбу иш бўйича Давлат хавфсизлик хизмати собиқ раҳбари Теймураз Жанашия ҳам айбланмоқда ва унга 300 минг лари миқдорида жарима тўлаш белгиланган. Айбланувчиларга бюджетдан 9 миллион лари (тахминан 2 миллион АҚШ доллари) ўзлаштириш айби қўйилган.
Тбилисидаги Vivamed клиникасидан видеоконференция орқали тўғридан тўғри эфирга чиққан Саакашвили ўзининг соғлиғи туфайли ҳукмни кечиктиришни сўради, бироқ суд бу илтимосни рад этди. Саакашвили айбдор эмаслигини маълум қилган.
Саакашвили 2021 йил 29 сентябрь куни яширинча Грузияга келган. 1 октябрда у Тбилисида қўлга олиниб, Рустави шаҳридаги қамоқхонага жойлаштирилган. Собиқ президент очлик эълон қилган. 8 ноябрь куни у қариндошлари ва адвокатлари розилигисиз Руставидаги қамоқхонадан Тбилисининг Глдани туманидаги қамоқхона шифохонасига ўтказилган. 20 ноябрда Саакашвили Гори шаҳридаги ҳарбий госпиталга кўчирилган ва у ерда очликни тўхтатган. 2022 йил 12 майдан буён у Тбилисидаги Vivamed фуқаролик клиникасида даволанмоқда.
Грузияда Саакашвили бир нечта жиноят ишларида айбланмоқда. У ўзининг ҳибсга олиниши ноқонуний эканини ва унга қўйилган айбловлар сохталаштирилганини таъкидламоқда.
Маълумот учун, Саакашвили аввалроқ олти йилга озодликдан маҳрум этилган эди. Мтавари TV хабарига кўра, янги ҳукм унинг қамоқ муддатини яна уч йилга узайтирди.
Изоҳ (0)