Украина Американинг Space Exploration Technologies Corp. компанияси билан Starlink сунъой йўлдошлари учун 10 мингдан ортиқ терминаллар етказиб бериш ҳақида келишиб олди. Бу ҳақда Украина бош вазири ўринбосари, рақамли трансформация бўйича вазир Михаил Фёдоров маълум қилди.
Унинг сўзларига кўра, терминаллар яқин ойларда етказиб берилади, тўлов бўйича ёрдам беришга эса бир нечта Европа мамлакатлари рози бўлган.
Bloomberg’га берган интервьюсида Фёдоров SpaceX ва унинг раҳбари Илон Маск «муаммоларга тезкорлик билан жавоб қайтараётгани» ва Украинага ёрдам кўрсатаётганини айтди. Вазирнинг сўзларига кўра, у америкалик бизнесмен билан тўғридан-тўғри мулоқот қилган. «Маск Украинани қўллаб-қувватлашда давом этишига ишонтирди. Бизда катта кўламли ўчишлар бўлганида, ўша куниёқ унга ёздим, у эса зудлик билан жавоб қилиб, бир қанча чоралар кўришга ҳам улгурди», — деди Михаил Фёдоров.
Унинг аниқлик киритишича, Россия ҳарбий операцияси бошланганидан буён Украина қарийб 22 мингта Starlink антенналарини қўлга киритган. Янгиларини етказиб бериш ҳақида шартнома тузилганича йўқ, бироқ, вазир аниқлик киритишича, баъзи Евроиттифоқ давлатлари «тўловни бўлишишга тайёр». У айнан қайси мамлакатлар ҳақида гап бораётганини айтмади, «айни пайтда барча молиявий масалалар ҳал қилинган»ини қўшиб қўйди. Starlink антенналари электр токи билан ишлайди, аммо генераторлардан ёки қувватлаш блокидан заряд олиши мумкин.
Starlink тармоғи Украинада уруш бошланганидан кейин кўп ўтмай ишга туширилган эди. Коммуникация инфратузилмаси ўққа тутилиши шароитида у мамлакат мудофаа қобилияти учун муҳим аҳамиятга эга: ундан украиналик ҳарбийлар ҳам фойдаланади. Айни вақтда, компания кўпчилик хизматларни бепул тақдим этмоқда.
SpaceX куз бошида Пентагондан Украинада Starlink’ни молиялаштиришни ўз зиммасига олишни сўраган, Маск харажатларни ойига 20 миллион долларга баҳолаган. Шундан кейин АҚШ президенти маъмурияти иттифоқдошлар билан Украинани сунъий йўлдош алоқаси билан таъминлаш масаласини муҳокама қилаётганини билдирган. Бироқ октябрь ўрталарида бизнесмен Украинада алоқани бепул таъминлашга ваъда берган.
Ноябрь бошида Украинада молиялаштириш билан боғлиқ муаммолар туфайли, 1,3 мингта Starlink терминаллари ишлашдан тўхтагани, бу Украина қуролли кучлари учун «улкан муаммо»га айлангани хабар берилди. Кейинроқ Украина Польша ҳукуматидан Американинг SpaceX компаниясида ишлаб чиқарилган қўшимча 1570 та Starlink сунъий йўлдош терминалларини олгани маълум бўлди.
Мавзуга доир:
Изоҳ (0)