«Дарё» нашри 20 декабрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Путин Лукашенкони Украинадаги урушга қўшилишга кўндира олмадими? Айни пайтда Россия ва Беларусь муносабатлари
ISW Россия ва Беларусь раҳбарлари Украинадаги урушни муҳокама қилишдан тийилганига эътибор қаратди. Шу билан бирга, Минск, гўёки, «Ғарбдан хавфга дуч келгани»ни айтди. Ўз навбатида, Путин беларуслик учувчиларни «махсус жанговар каллаклардан иборат ўқ-дорилар»ни қўллашга ўргатиш имкониятини кўриб чиқишни таклиф қилди.
Айни вақтда Лукашенко Москва С-400 ҳаво ҳужумига қарши мудофаа тизимлари ва «Искандер» мажмуаларини тақдим этишини маълум қилди. Россия президенти сўзларига кўра, томонлар, шунингдек, мудофаа маконини яратишни ҳам муҳокама қилган.
Эслатиб ўтамиз, 19 декабрь куни Россия президенти Владимир Путин бир неча йил ичида биринчи марта Александр Лукашенко билан учрашиш учун Минскка келди. ISW таҳлилчилари Путин бу билан Украинага қарши урушнинг янги босқичи учун ахборот шароитларини яратишга уринаётганини маълум қилди. Бундан ташқари, Беларусь томонидан ҳужум имкониятлари ҳам истисно қилинмаганди.
Ўз навбатида, Украина Миллий хавфсизлик ва мудофаа хизмати котиби Алексей Даниловнинг фикрича, Путин ўз ташрифи чоғида Лукашенкога босим ўтказиб, унинг Беларусь қўшинларини Украинага қарши урушга юборишга имкон беришига эришмоқчи бўлган, бироқ Минск уруш қилишни истамаган.
Аввалроқ Россия президенти Владимир Путин мамлакатнинг Беларусни «ўзлаштириб олиш», «ўзига сингдириб олиш» режаларини рад этган ва буни сафсата деб атаган эди. «Гап ўзлаштириб олишда эмас, масала иқтисодий сиёсатни келишиб олишда, худди бошқа кўплаб интеграцион бирлашмаларда бўлгани каби», — дея Путин бундай миш-мишлар ҳақидаги саволларга жавоб берди.
Жаҳондаги айни вазиятда БМТ қайси тарафнинг таҳдидларига ён бермоқда?
АҚШ Бирлашган Миллатлар Ташкилоти бош котиби Антониу Гутерришни «Россия таҳдидларига очиқдан очиқ ён беришда» ва Россиянинг Украинага ҳужум учун чиндан ҳам Эрон дронларидан фойдаланаётганини текшириш бўйича миссия жўнатмаганликда айблади.
Бир қатор давлатлар БМТдан тергов ўтказиш учун Киевга гуруҳ юборишни талаб қилдиБуюк Британия, Франция, Германия, АҚШ ва Украина Эронда ишлаб чиқарилган учувчисиз учоқларнинг Россияга етказиб берилиши БМТ Хавфсизлик Кенгашининг 2015 йилда қабул қилинган резолюциясини бузиш эканини даъво қилмоқда. Улар Гутерришнинг Киевга текширув учун расмийлардан иборат гуруҳ юборишини истамоқда.
Ўз навбатида, Россиянинг БМТдаги элчиси Василий Небензя бу айбловларни «ҳақиқатдан йироқ» деб атаган ва ташкилотни Ғарб давлатлари босимига бўйсунмасликка чақирган.БМТ Бош котибининг сиёсий масалалар бўйича ўринбосари Розмари Ди Карло БМТ котибиятига ушбу мамлакатлардан ёзма сўровлар келиб тушганини тасдиқлаб, маълумотларни ўрганиш ва хулосаларни Хавфсизлик Кенгашига етказишга ваъда берган.
Гутерришнинг ўзи эса дронлар масаласи «уруш масаласи бўйича қилинаётган ишларнинг кенгроқ контекстида кўриб чиқилиши, бу ҳолда расмийларни Киевга қачон юбориш кераклиги аниқланиши» ҳақида гапирди.
Starlink Украинага ёрдам беришда давом этмоқда
Украина Американинг Space Exploration Technologies Corp. компанияси билан Starlink сунъий йўлдошлари учун 10 мингдан ортиқ терминаллар етказиб бериш ҳақида келишиб олди. Бу ҳақда Украина бош вазири ўринбосари, рақамли трансформация бўйича вазир Михаил Фёдоров маълум қилди. Унинг сўзларига кўра, терминаллар яқин ойларда етказиб берилади, тўлов бўйича ёрдам беришга эса бир нечта Европа мамлакатлари рози бўлган.
Bloomberg’га берган интервьюсида Фёдоров SpaceX ва унинг раҳбари Илон Маск «муаммоларга тезкорлик билан жавоб қайтараётгани» ва Украинага ёрдам кўрсатаётганини айтди. Вазирнинг сўзларига кўра, у америкалик бизнесмен билан тўғридан-тўғри мулоқот қилган. «Маск Украинани қўллаб-қувватлашда давом этишига ишонтирди. Бизда катта кўламли ўчишлар бўлганида, ўша куниёқ унга ёздим, у эса зудлик билан жавоб қилиб, бир қанча чоралар кўришга ҳам улгурди», — деди Михаил Фёдоров.
Унинг аниқлик киритишича, Россия ҳарбий операцияси бошланганидан буён Украина қарийб 22 мингта Starlink антенналарини қўлга киритган. Вазир Янги партияни етказиб бериш ҳақида«айни пайтда барча молиявий масалалар ҳал қилинган»ини қўшиб қўйган.
Starlink тармоғи Украинада уруш бошланганидан кейин кўп ўтмай ишга туширилган эди. Коммуникация инфратузилмаси ўққа тутилиши шароитида у мамлакат мудофаа қобилияти учун муҳим аҳамиятга эга: ундан украиналик ҳарбийлар ҳам фойдаланади. Айни вақтда, компания кўпчилик хизматларни бепул тақдим этмоқда.
Ўзбекистонда 2023 йил «Инсонга эътибор ва сифатли таълим» йили деб эълон қилинди. Келаётган йилда Ўзбекистонликларни қандай ўзгаришлар кутмоқда?
Бугун 20 декабрь куни Ўзбекистон президенти Шавкат Мирзиёев Олий Мажлисга мурожаатнома йўллади. Давлат раҳбари 2023 йилни «Инсонга эътибор ва сифатли таълим» йили деб эълон қилди.
«Ушбу соҳада бошлаган ислоҳотларимизни давом эттиришимиз, таълим даргоҳларида ўқитувчи ва мураббийлар билан кўпроқ мулоқот қилиб, сифатни ошириш бўйича улар қўйган масалаларни биргаликда ҳал қилишимиз керак. Келгуси йил Давлат дастурига халқимиз кўтарган барча масалаларни аниқ ечимлари билан киритишимизда депутат ва сенаторлар, маҳалла вакиллари, зиёлилар, ёшлар, тадбиркорлар ва кенг жамоатчилигимиздан фаол бўлишларини сўрайман», — деган Шавкат Мирзиёев.
Президент келгуси йилда олийгоҳлар учун имтиёзли таълим кредитларига ресурслар 2 баробар кўпайтирилиши ва 2023- ўқув йилидан барча вилоятлар ва Тошкент шаҳри мактабларида ҳам бепул овқатланиш жорий этилиши ҳақида маълум қилди.
Ҳозирда долзарб масала ҳисобланган энергетика соҳасидаги муаммоларга тўхталар экан Шавкат Мирзиёев йил бошидан қуввати 1,5 минг мегаваттли 7 та электр станцияси ишга туширилганини айтди. «Келаси йилда яна 4,5 минг мегаваттли 11 та йирик лойиҳани якунига етказамиз. Жумладан, Бухоро, Жиззах, Қашқадарё, Навоий, Самарқанд, Фарғона ва Тошкент вилоятларида барпо этиладиган қуёш ва шамол электр станциялари ҳисобига, қўшимча 14 миллиард киловатт электр ишлаб чиқарилади. Бу орқали хонадонларга бериладиган электр энергияси 50 фоизга кўпаяди», — деган президент.
Шунингдек давлат раҳбари иқтисодиёт, соғлиқни сақлаш ва суд-прокуратура йўналишларида ҳам қатор ўзгаришлар ҳақида эълон қилган. Ўзбекистон президенти 2023 йилда ихчам ва самарали давлат бошқарув тизимига ўтишни таклиф қилиб,вазирлик ва идоралар сони ҳозирги 61 тадан 28 тагача камайтирилишини маълум қилди.
Изоҳ (0)