Путин «Украина Қримга бостириб кирса, Россия ядро қуролидан фойдаланиши эҳтимоли» ҳақида Илон Маскка айтган деб хабар тарқатилди. Маск эса буни рад этди

Илон Маск Россия ва Украина ўртасидаги тинчлик шартларини Twitter’да ёзишдан олдин Владимир Путин билан гаплашган бўлиши мумкин, деб ёзади Meduza.

Бу ҳақда миллиардер билан суҳбатга ишора қилган америкалик сиёсатшунос Ян Бреммер маълум қилди. Бреммер Маск билан суҳбат мазмунини ўзининг Eurasia Group консалтинг компанияси обуначиларига юборилган почта рўйхатида келтирган.

Илон Маск Бреммерга Путин «музокараларга тайёр»лигини, бироқ бунинг учун Қрим Россияники бўлиб қолса, Украина нейтрал бўлиб, ДХР, ЛХР, Херсон ва Запорожье вилоятларининг аннексия қилинишини тан олиши кераклигини айтган.

Бреммернинг сўзларига кўра, Путин «нима бўлишидан қатъи назар» бу мақсадларга эришилишини ҳақида Маскка айтиб берган. У, шунингдек, агар Украина аннексия қилинган Қримга бостириб кирса, ядровий зарба берилиши мумкинлигини ҳам эслатиб ўтган. Маск Бреммерга «бундай натижага йўл қўймаслик учун нима керак бўлса, барчасини қилиш кераклигини» айтган.

Кейинроқ Илон Маск ўз Twitter саҳифаси орқали тарқалган хабарларни рад этди.

«Йўқ, ундай бўлмади. Мен Путин билан фақат бир марта гаплашганман ва бу тахминан 18 ой олдин эди. Мавзу космос ҳақида бўлган».

Мавзуга доир: Илон Маск Украинадаги уруш қай ҳолатда якун топиши мумкинлигини тахмин қилди