«Дарё» нашри 27 октябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия Илон Маскнинг Starlink сунъий йўлдошларига зарба бериш билан таҳдид қилмоқда.
Агар Украина ҳарбийлари Starlink сунъий йўлдошларидан фойдаланишда давом этса, бу тизимлар Россия Қуролли кучлари учун қонуний нишонга айланиши мумкин. Бу ҳақда Россия ташқи ишлар вазирлигининг Ядро қуролларини тарқатмаслик ва назорат қилиш департаменти бошлиғи ўринбосари Константин Воронцов маълум қилди.
Илон Маскнинг SpaceX компаниясига тегишли Starlink тизимлари ҳозирда Украинага разведка маълумотларини узатишда ва Украина Қуролли кучларини ёпиқ алоқа билан таъминлашда асосий рол ўйнамоқда.
Аввалроқ CNN SpaceX сентябрь ойида Пентагонга мурожаат қилиб, Украинада Starlink терминаллари фаолиятини молиялаштиришни сўрагани, чунки буни ўзи ортиқ уддалай олмаслиги ҳақида хабар берганди. Маск ўша вақтда Россия Украинада Starlink’ни «ўлдиришга» уринаётганини, чунки бу тармоқ — жанговар ҳаракатлар зонасида ишлашда давом этаётган ягона алоқа тизими эканини айтган эди.
«Вагнер» Афғонистон махсус бўлинмаларини Украинадаги уруш учун ёлламоқда, улар америкалик инструкторлар томонидан ўқитиб тайёрланган
«Вагнер» хусусий ҳарбий компанияси Украинадаги урушга Афғонистон армиясининг элита махсус бўлинмалари вакилларини ёлламоқда, улар америкалик инструкторлар томонидан ўқитилган ва ҳокимият тепасига «Толибон» ҳаракати келганидан кейин ишсиз қолган. Бу ҳақда Foreign Policy махсус бўлинмалар орасидаги манбаларига таяниб хабар берди.
Foreign Policy манбалари ҳисоб-китобларига кўра, «Вагнер» гуруҳига 10 минг нафаргача афғон жангчилари қўшилиши мумкин, чунки уларнинг «йўқотадиган ҳеч нарсаси йўқ», шу билан бирга, уларнинг кўпчилиги толиблар режими билан муносабатларни йўлга қўяётган Россияни Афғонистоннинг душмани деб ҳисоблайди. Аввалроқ Россия ТИВ АҚШни Афғонистондаги вазиятни беқарорлаштиришда айблаган эди.
Россия Илон Маскнинг Starlink сунъий йўлдошларига зарба бериш билан таҳдид қилмоқда
Агар Украина ҳарбийлари Starlink сунъий йўлдошларидан фойдаланишда давом этса, бу тизимлар Россия Қуролли кучлари учун қонуний нишонга айланиши мумкин. Бу ҳақда Россия ташқи ишлар вазирлигининг Ядро қуролларини тарқатмаслик ва назорат қилиш департаменти бошлиғи ўринбосари Константин Воронцов маълум қилди. Илон Маскнинг SpaceX компаниясига тегишли Starlink тизимлари ҳозирда Украинага разведка маълумотларини узатишда ва Украина Қуролли кучларини ёпиқ алоқа билан таъминлашда асосий рол ўйнамоқда.
Аввалроқ CNN SpaceX сентябрь ойида Пентагонга мурожаат қилиб, Украинада Starlink терминаллари фаолиятини молиялаштиришни сўрагани, чунки буни ўзи ортиқ уддалай олмаслиги ҳақида хабар берганди. Маск ўша вақтда Россия Украинада Starlink’ни «ўлдиришга» уринаётганини, чунки бу тармоқ — жанговар ҳаракатлар зонасида ишлашда давом этаётган ягона алоқа тизими эканини айтган эди.
ISW: Путин Украина билан музокаралардан манфаатдор эмас
Россия президенти Владимир Путин Украина билан жиддий музокаралардан манфаатдор эмас ва урушни давом эттириб, ҳали ҳам максималистик мақсадлар ортидан қувмоқда — Россия раҳбарининг баёнотлари шундан дарак бермоқда, деб ёзади АҚШнинг Урушни тадқиқ қилиш институти (ISW) таҳлилчилари.
МДҲ хавфсизлик органлари ва махсус хизматлари вакиллари билан яқинда бўлиб ўтган учрашувда Путин Украина «суверенитетини йўқотгани»ни ва АҚШ ундан Россия, Россия-Беларусь иттифоқ давлати, КХШТ ва МДҲга қарши «уриб зарба бериш воситаси сифатида фойдаланаётгани»ни айтган.
Россия Давлат думаси спикери Вячеслав Володин бу баёнотни кенгайтириб, «Украина давлат сифатида мавжуд бўлиш имкониятини йўқотгани», «НАТО томонидан эгаллаб олингани» ва «АҚШ мустамлакасига айлангани» ҳақида гапирди. Бундай муомала низони тартибга солиш у ёқда турсин, ўт очишни тўхтатиш ҳақида тенгма-тенг музокараларга зид келади, дея қайд этди таҳлилчилар.
Ташқи ишлар вазирлиги Украина ҳукуматига дронлар масаласида мурожаат йўллади
Интернет тармоғида украиналик журналист ва блогер Дмитрий Гордоннинг исроиллик тадбиркор Леонид Невзлин билан видеоинтервьюси тарқалиб, гўёки унда Эроннинг учувчисиз учоқлари (дрон) Ўзбекистон ҳудудида йиғилаётгани тўғрисида ёлғон маълумотлар келтирилган, деб баёнот бермоқда Ташқи ишлар вазирлиги.
Маълум қилинишича, Ўзбекистон Эрон Ислом Республикаси билан ҳарбий-техник соҳада ҳамкорлик қилмайди ва ўз ҳудудида Эрон ҳарбий техникасини йиғмайди. Шу билан бирга, ҳозирги вақтгача Украина томонидан ҳам, бошқа хорижий ҳамкорлардан ҳам «Эрон дронларини йиғиш» масаласи бўйича расмий мурожаатлар келиб тушмаган.
Шу муносабат билан Ташқи ишлар вазирлиги Украина расмий ҳукуматига Украина оммавий ахборот воситаларида Ўзбекистон тўғрисида икки томонлама муносабатларга путур етказиши мумкин бўлган бундай асоссиз айбловлар ва бошқа ишончсиз маълумотлар тарқатилишининг олдини олиш бўйича тегишли чоралар кўришни сўраб мурожаат қилди.
Изоҳ (0)