AQSH prezidenti Donald Tramp 4-mart kuni Ukrainaga har qanday yordamni to‘xtatib qo‘ydi. Ukraina prezidenti Vladimir Zelenskiy turli idoralar rahbarlariga kelajakdagi harbiy yordam haqida rasmiy ma’lumot olishni topshirdi.
Ukraina rahbari ta’kidlashicha, bugungi kunda ko‘pchilikda bir savol bor: “Amerikaning yordami bilan bundan keyin nima bo‘ladi?”
Men Ukraina mudofaa vaziriga, razvedka xizmatlari rahbarlariga va diplomatlarga Amerika Qo‘shma Shtatlaridagi hamkasblari bilan bog‘lanib, rasmiy ma’lumot olishni topshirdim. Odamlar taxminlar qilmasligi kerak. Ukraina va Amerika muloqotga, bir-birining aniq pozitsiyasini bilishga loyiq. Ayniqsa, keng ko‘lamli urush paytida insonlar hayotini himoya qilish haqida gap ketganda, dedi Zelenskiy.
Siyosatchi Ukraina bir necha hafta davomida turli signallar olgani va yordam to‘xtatilishi allaqachon bo‘lib o‘tganini aytdi.
Gumanitar yordam, energetika yordami to‘xtatildi. Shuningdek, yanvar oyining oxirida harbiy yordam ham to‘xtatilgan edi, ammo o‘shanda hamma narsa tezda tiklandi. Biz xavf-xatarlarni ko‘rdik. Shuning uchun bizning xizmatlarimiz — ham harbiy, ham maxsus xizmatlar — vaziyatning har qanday rivojlanishida harakat algoritmlarini ishlab chiqishga ulgurdi. Hozir 2022-yil emas. Hozir bizning barqarorligimiz yuqoriroq. Bizda himoya vositalari mavjud, dedi u.
Shu bilan birga, prezident Ukraina uchun “urushni haqiqatan ham tugatishda Amerika bilan normal, sheriklik munosabatlari muhim” ekanini ta’kidladi.
Hech birimiz cheksiz urushni xohlamaymiz, deb izoh berdi Zelenskiy.
U Ukraina “ko‘rsatilgan va ko‘rsatilayotgan hamda bugungi kunda Yevropada xavfsizlikning ancha nozik asoslarini saqlab qolishga xizmat qilayotgan barcha yordam uchun” Amerikaga doimo minnatdor bo‘lishini bildirdi.
AQSH harbiy yordami to‘xtashi
AQSH Ukrainaga barcha joriy harbiy yordamni uning rahbariyati tinchlikka sodiqligini namoyish etmaguncha to‘xtatadi. Pentagonning yuqori martabali vakili mazkur ma’lumotni tasdiqlagan. Oq uydagi janjaldan so‘ng Tramp agar ukrainalik hamkasbi Zelenskiy tinchlik istayotganini tasdiqlasa, Kiyev Vashington bilan muzokaralarga qaytishi mumkinligini aytdi.
Shundan so‘ng 5-mart kuni Tramp Ukraina prezidentidan “muhim maktub” olganini, unda Ukraina tinchlik muzokaralariga tayyorligini yozilganini aytdi. AQSH prezidenti Rossiyadan ham bu borada “kuchli signallar” bo‘lganini qayd etdi.
AQSH 2022-yil 24-fevraldan beri Ukrainaga 65,9 milliard dollarlik harbiy yordam ko‘rsatdi. Vashington Kiyevga qancha miqdorda qurol yuborganini ma’lum qilmadi.
Izoh (0)