АҚШ президенти Дональд Трамп ва Россия раҳбари Владимир Путин 20 апрелга тўғри келадиган Пасха байрами ёки 9 майга қадар Украинадаги урушни тўхтатиш бўйича келишувга эришиши мумкин. Бу ҳақда Украина ва Ғарбнинг юқори мартабали амалдорларига таяниб, Financial Times хабар берди.
“Путин шундай муҳим кунлардан бирида келишувга эришишни хоҳлайди”, дейди украиналик амалдор.
Путинга яқин манбаларга кўра, президентнинг асосий мақсади Россияга Европадаги таъсир доирасига ўхшаш мавқени таъминлайдиган янги хавфсизлик тизимини яратишдир. Бу худди Иккинчи жаҳон уруши охирида Ялта конференцияси Совет иттифоқига берган имкониятларга ўхшаш бўлиши кутилмоқда.
Ҳозирги вазият Путин учун уч йиллик урушнинг бошқа ҳар қандай давридагидан ҳам қулай кўринмоқда, деб таъкидлайди Берлиндаги Карнеги Евроосиё маркази директори Александр Габуев.
У АҚШ Украинани ҳарбий ва дипломатик жиҳатдан қўллаб-қувватлашни, разведка маълумотлари алмашишни тўхтаца, Киев жуда оғир аҳволга тушиши таъкидлади.
Бу Европа давлатлари янада кўпроқ аралашса ҳам, инқироздан чиқишни кафолатламайди, деди у.
Таъкидланишича, Трампнинг 12 февраль куни россиялик ҳамкасбига телефон қўнғироғи Москвада сезиларли кайфият уйғотган.
Биргина қўнғироқ тарих йўналишини ўзгартириши мумкин — бугун АҚШ ва Россия раҳбарлари, эҳтимол, қарама-қаршилик эмас, балки ҳамкорликка асосланган келажак эшигини очди, дейди маҳбусларни алмашиш бўйича АҚШ билан махфий музокаралар олиб борган Россия суверен бойлик жамғармаси раҳбари Кирилл Дмитриев.
Бу қўнғироқ Жо Байден давридаги АҚШ сиёсатидан кескин бурилиш бўлди. Байден Россияни изоляция қилиш учун бошқа Ғарб мамлакатлари билан ҳамкорлик қилаётган бир пайтда, Украинани “керак бўлгунча” қўллаб-қувватлашга ваъда берганди. Энди эса Трамп Украина шартлари асосидаги ғалаба “реалистик эмас” деб баҳоламоқда.
Ниҳоят, америкаликлар уруш бошланганидан бери украиналикларга сингдириб келган беҳуда хомхаёлларсиз жиддий муносабатда бўлмоқда. Бу соғлом фикр ва урушни тўхтатиш имкониятидир, деди Россиянинг собиқ юқори лавозимли амалдори.
Путин уч кун ўтганидан сўнг, Россиянинг ғалаба режалари амалга ошмаётганини англаб етганида, ўзининг барча хаёлларидан воз кечганди. Лекин европаликлар ва америкаликлар шундан бери хомхаёллар таъсирида бўлиб келди ва энди англай бошлашди”, дейди собиқ амалдор.
АҚШ президенти Путин ва Зеленский билан телефонда суҳбатлашди
Трамп 12 февраль куни дастлаб россиялик ҳамкасби Владимир Путинга қўнғироқ қилган. Томонлар Украинадаги уруш, Яқин Шарқ, энергетика, сунъий интеллект ва доллар таъсири ҳақида гаплашган. Россия президенти Трампни Москвага таклиф қилган ва Украина масаласини ҳал қилиш учун Америка расмийларини қабул қилишга тайёрлигини айтган. Трамп эса улар ўртасидаги учрашув Саудия Арабистонида бўлишини айтмоқда.
Украина раҳбари эса америкалик ҳамкасби билан суҳбат тафсилотларини қуйидагича изоҳлаган:
Тинчликка эришиш имкониятлари ҳақида узоқ гаплашдик. Ҳеч ким Украинадан кўра кўпроқ тинчликни хоҳламайди. АҚШ билан биргаликда Россия агрессиясини тўхтатиш ва барқарор тинчликни таъминлаш устида кейинги қадамларимиз харитасини белгиламоқдамиз, бўлажак учрашувларни режалаштирдик, деди Зеленский.
Украина президентига кўра, суҳбатда Трамп Путин билан нималарни муҳокама қилганини ҳам айтган. Бироқ бунга аниқлик киритмаган.
Изоҳ (0)