АҚШ президенти Дональд Трамп Россияни НАТО ва Европа учун таҳдид деб ҳисоблашдан бош тортди.
Fox News телеканали журналистларининг Украина президенти Владимир Зеленскийнинг “Россия шу йилнинг ўзида НАТО давлатларидан бири – Польша ёки Литвага ҳужум қилиши мумкинлиги” ҳақидаги сўзларига изоҳ бериш илтимосига қуйидагича жавоб берди:
Мен бунга қўшилмайман.
Трампнинг таъкидлашича, у бунга “мутлақо” ишонмайди.
Йўқ, менимча, Путин урушни тўхтамоқчи. Агар у давом эттирмоқчи бўлса, бу биз учун катта муаммо бўларди. У ҳам, Зеленский ҳам можарога чек қўймоқчи, дея ўз жавобини асослади Трамп.
АҚШ етакчисининг таъкидлашича, “Обама даврида Россия Украинанинг кўплаб ҳудудларини олишга муваффақ бўлди, энди эса Россия ҳаммасини олишга ҳаракат қилмоқда”.
Бу жуда ёмон. Бу ҳақиқатан ҳам жуда ёмон. Кўплаб одамлар аллақачон вафот этган, кўплаб шаҳарлар, минг йиллик кўркам гумбазлар вайрон бўлган, деди Трамп Украинадаги урушни якунлаш бўйича режалаштирилган учрашув арафасида.
Зеленский: “Путин НАТОга қарши уруш олиб боради”
Аввалроқ Зеленский Россия жорий йилдаёқ Польша ёки Литвага ҳужумга тайёргарлик кўриши мумкинлигини айтди.
Биз Путин НАТОга қарши уруш олиб боради, деб ҳисоблаймиз. Бу ёзда – ёзнинг бошида ёки охирида бўлиши мумкин. У буни қачон тайёрлайди, билмайман. Аммо бу содир бўлади, деди Украина президенти.
У Украина разведкаси маълумотларига таяниб берган баёнотида Россия Беларусда 150 минг нафар ҳарбий иштирок этадиган янги ҳарбий машғулотларга тайёргарлик кўраётганини айтди. Зеленский Россиянинг Украинага кенг кўламли бостириб кириши 2021 йилдан бери давом этаётган “бор-йўғи рамзий машғулотлар” билан бошланганини эслатди.
Европа Иттифоқи кенгаши раиси Антонио Кошта Financial Times газетасига берган интервьюсида Россия глобал миқёсда таҳдид солаётганини айтди.
Янги хавфсизлик архитектураси бўйича музокаралар Россия нафақат Украина учун, балки глобал таҳдид эканини ҳисобга олиши керак, дея таъкидлади у. Сиёсатчи Кремль Европа Иттифоқи ва НАТОга аъзо бўлган Болтиқбўйи давлатлари, хусусан, Эстония, Латвия ва Литвага нисбатан “тажовузкор позиция”да эканини қайд этди.
АҚШ ва Россия ўртасида Украинадаги урушни тугатиш бўйича музокаралар Саудия Арабистонида бўлиб ўтади
18 февраль куни Саудия Арабистони пойтахтида АҚШ ва Россия вакилларининг Украинадаги урушни тугатиш бўйича музокаралари бўлиб ўтади. АҚШ делегацияси таркибига давлат котиби Марко Рубио, Оқ уйнинг миллий хавфсизлик бўйича маслаҳатчиси Майк Уолц ва Трампнинг Яқин Шарқ бўйича махсус вакили Стив Уиткофф киради.
Кремлнинг таъкидлашича, Россия ТИВ раҳбари Сергей Лавров ва Россия президенти ёрдамчиси Юрий Ушаков АҚШ делегацияси билан музокаралар ўтказиш учун Ар-Риёдга учиб кетмоқда.
Учрашувда эътибор биринчи навбатда “Россия-АҚШ муносабатларининг бутун мажмуасини тиклаш”, шунингдек, “Украинадаги вазиятни тартибга солиш бўйича эҳтимолий музокараларни тайёрлаш” ва Путин ва Трампнинг учрашувини ташкил этишга қаратилади, деди Кремль матбуот котиби Дмитрий Песков.
NBC: АҚШнинг Россия ва Украина билан алоҳида, кейин эса қўшма музокаралари
NBC телеканали АҚШ делегацияси Россия ва Украина билан дастлаб алоҳида, кейин эса биргаликда музокаралар ўтказишини маълум қилди.
Айнан шунинг учун Украина АҚШ ва Россия вакилларининг Саудия Арабистонидаги музокараларига таклиф қилинмади, деди телеканалга икки америкалик амалдор.
Изоҳ (0)