Россияда чақирув ёшидаги фуқаролар ҳарбий корхоналарга ишлаш учун юборилиши мумкин. Фуқаролар давлат мудофаа буюртмасини бажарувчи корхоналарда муқобил хизматни ўташи мумкинлиги тўғрисидаги қонун лойиҳаси давлат Думасига киритилди.
Унга кўра, мудофаа комплекси корхонасига ишга жойлашган фуқаро анъанавий муддатли хизматни муқобил фуқаролик хизматига алмаштириши мумкин. Украина билан уруш шароитида бу чора давлат мудофаа буюртмасини ўз вақтида бажаришда зарур бўлган кадрлар танқислиги муаммосини ҳал қилади. Шунингдек, ҳарбий маҳсулотлар ишлаб чиқариш ҳажмини ошириш ва уларни етказиб беришни тезлаштириш имконини беради.
Қонун лойиҳасида муқобил хизматни ўташ жойлари рўйхатини кенгайтириш, унга давлат мудофаа буюртмасининг бош ижрочилари бўлган корхоналарни киритиш таклиф этилмоқда.
2024 йил сентябрь ойида президент Владимир Путин Россия Қуролли кучлари штатларини 2 389 130 кишигача ошириш тўғрисидаги фармонни имзолади. Ҳужжат 1 декабрдан кучга кирди. Натижада ҳарбий хизматчиларнинг штат бирлиги 180 минг кишига оширилди.
Бунгача армия сони сўнгги марта 2023 йил декабрь ойида қайта кўриб чиқилган, ўшанда ҳарбийлар сони 170 минг кишига кўпайтирилиб, 2 миллион 209 минг 130 нафарга етказилганди.
Изоҳ (0)