Ангела Меркель Германиянинг мигрантларни интеграция қилишда муваффақиятига ишонади

Германиянинг собиқ канцлери Ангела Меркель мамлакат муҳожирларини интеграция қилишда яхши натижаларга эришишига ишонишини билдирди. Бу ҳақда DW нашри ёзди.

Манбага кўра, 2015 йилда Меркель ўн минглаб қочқинларга Германияга кириш имкониятини берган. Ўшанда у шундай деган: “Биз буни уддалаймиз.”

Собиқ ҳукумат раҳбари АRD телеканали учун тайёрланган ҳужжатли фильмда мамлакат муҳожирларни интеграция қилиш масаласида сезиларли ютуқларга эришилганини ва бу борадаги ишлар давом этиши кераклигини айтган.

“Бу (интеграция) — жараён. Аммо ҳозирги пайтга келиб биз кўп нарсага эришдик. Қилиниши керак бўлган ишларни эса давом эттириш зарур,” деган Меркель.

Германияга 2015 йилда Болқон йўли орқали ўн минглаб қочқинлар кириб келган. Уларнинг умумий сони бир неча юз мингга етган. Меркель эса уларни мамлакатга қабул қилиш ҳақида фармон берган. Ўша даврда машҳур “Биз буни уддалаймиз” иборасини ишлатган.

Кейинчалик бу ибора Меркелга нисбатан кесатиқ сифатида ҳам ишлатилган. Лекин у бу иборада ўзини назарда тутмаганини, балки “биз” дея немис халқига ишора қилганини тушунтирган.

“Германия учун юз минглаб қочқинларни қабул қилиш оғир вазифа эмас эди. Мен бундай деб ўйламайман. Германия — кучли давлат,” деган у.

Меркелнинг айтишича, бошқа муқобил йўл сифатида қочқинларни куч ишлатиб мамлакатга киритмаслик ҳам бўлган. Бироқ у ҳеч қачон бундай йўлдан боришга рози бўлмаганини таъкидлаган.

Шунингдек, Меркель Сурия ва бошқа инқирозли минтақалар аҳолиси учун кўпроқ иш қилмаганини ҳам тан олган. Мигрантларни оммавий қабул қилиш ҳақидаги қарори эса, мамлакат ичкарисидаги консерватив партияларнинг оммалашувига олиб келган.

Христиан-демократик иттифоқ партиясининг бош котиби Карстен Линнеман собиқ канцлернинг мигрантлар бўйича сиёсатини қониқарсиз деб баҳолаган.

“2015 йилдан буён бизга 6,5 миллион мигрант келди, бироқ ҳозирда уларнинг ярмидан камроғи иш билан таъминланган. Буни, юмшоқ қилиб айтганда, қониқарсиз деб ҳисоблайман,” деган Линнеман.

Жорий йилнинг июль ойида Германиянинг амалдаги канцлери Фридрих Мерс 2015 йил воқеаларига шундай изоҳ берган: “Бугун биламизки, у айтган соҳада биз аниқ уддалай олмадик.” Мерснинг фикрича, интеграция борасидаги рақамлар ҳам бу йўналишда нима содир бўлганини кўрсатиб турибди.

Бугунги кунда эса Германия меҳнат бозорини қонуний меҳнат муҳожирлари билан тўлдиришга эътибор қаратмоқда.