Россия Давлат думасининг Мудофаа бўйича қўмитаси парламент қуйи палатасига уч фарзандли оталар учун сафарбарликни кечиктириш тўғрисидаги қонун лойиҳасини рад этишни тавсия қилди. Тегишли ҳужжат Давлат думаси сайтида эълон қилинди. Бу ҳақда Meduza хабар берди.
Мудофаа қўмитаси қонун лойиҳаси “етарлича такомиллаштириш”га муҳтожлиги, уни ҳозирги кўринишида қабул қилиш армияга “ёллашга салбий таъсир кўрсатиши”ни таъкидлади. Ҳозирги вақтда 16 ёшгача бўлган тўрт ёки ундан ортиқ болани тарбиялаётган оталар сафарбарликни кечиктириши мумкин. Ушбу тоифага кирувчи шахслар доирасини 18 ёшгача бўлган уч нафар фарзандли оталарга кенгайтириш таклиф этилган. Мудофаа қўмитаси бунга қаршилик қилмоқда.
Қўмита қонун лойиҳаси муаллифлари фуқароларнинг максимал сонини “ҳарбий сафарбарликнинг салбий оқибатларидан” ҳимоя қилиш истагига “ҳамдард экани”, бироқ “кўп болали оилаларни ҳимоя қилишнинг бундай усулига” рози бўлолмаслигини таъкидлаган.
Қонун лойиҳаси муаллифларидан бири бўлган Давлат думаси депутати Нина Останина қўмита қарорига қўшилмаслигини билдирган.
Президент қарорида кўп болали оила деганда тўртта эмас, уч нафар фарзандли бўлиш назарда тутилган. Афсуски, бу Мудофаа қўмитасига етиб бормади, — деган у.
Изоҳ (0)