Россиянинг Украинага қарши кенг кўламли ҳужумидан сўнг битта тобутни тайёрлаш нархи 74 фоизга ошди. Бу ҳақда The Moscow Times хабар берди.
Маълум қилинишича, нарх 2022 йил январь ойидаги 4437 рублдан (566 минг сўм) 2024 йил октябрь ойида 7711 рублгача (салкам 984 минг сўм) ошган. Тобут нархларининг шиддат билан ўсиши урушнинг дастлабки ойларидан кузатилган. 2022 йил февраль—август ойларида уларнинг ишлаб чиқарилиши 12 фоизга ёки 548 рублга қимматлашган.
Сафарбарлик эълон қилинишидан кўп ўтмай, 2022 йил сентябрда битта тобут 4998 рублни ташкил этган, 2023 йил февралида 33 фоиз ошиб, 6669 рубль бўлган. Айрим ҳудудларда тобутлар бир неча баробар қимматлашган: Сахалинда 181 фоизга, Омск вилоятида 162 фоизга, Тамбов ва Смоленск вилоятларида мос равишда 104 ва 103 фоизга (2023 йил учун).
Қабр қазиш ҳам қиммат
“Росстат” маълумотларига кўра, қабр қазиш ҳам қимматлашмоқда: 2022 йил январь ойида бу хизмат 7692 рублни (981 минг сўм), 2024 йил октябрь ойида эса 9974 рублни (1 миллион 270 минг сўм) ташкил этган, яъни 30 фоизга ошган. Шу билан бирга, қабр қазиш нархи бўйича рекорд 2024 йил февраль ойида — 10 187 рубль (1 миллион 299 минг сўм, 2022 йил январига нисбатан 32 фоиз) қайд этилган.
Урушда қурбонлар кўпайиши билан Россияда маросим хизматларига талаб ортиб бормоқда. Россия ва Украина урушда қанча ҳарбий ҳалок бўлганини расман эълон қилмаган. Пентагон маълумотларига кўра, Россия армияси 615 минг аскарни йўқотган. НАТО ноябрь ойидаги йўқотишларни кунига 1,5 минг кишига баҳолаб, буни уруш бошланганидан бери рекорд кўрсаткич деб атади. Камида 48 минг россиялик жангчи фронтда бедарак йўқолган, дейди Россия мудофаа вазири ўринбосари Анна Сивилева.
Изоҳ (0)