Украинада махсус операция доирасида 700 мингдан ортиқ рус аскари жанг қилмоқда. Бу ҳақда Россия президенти Владимир Путин берган баёнотга асосланиб, The Moscow Times нашри хабар берди.
Манбада айтилишича, Россия раҳбари 14 июнь куни давлат телевидениесида Украинадаги рус қўшинлари билан боғлиқ вазият ҳақида қисқа ҳисобот эълон қилган. Президент нутқида қўшинлар сони ва жойлашуви ҳақида маълумот берган.
Владимир Путинга кўра, Украинада жанг қилаётган рус аскарлари сони 700 мингдан ошади. Ҳарбий ҳудуддаги мудофаа чизиғи атрофида рус армияси устунликни қўлга олган.
“Махсус ҳарбий амалиётимиз зонасида деярли 700 минг киши бор. Улар мустаҳкам позицияларда жойлашган ва юқори тайёргарликка эга”, — деган Россия раҳбари.
Сўнгги марта Владимир Путин ўтган йилнинг декабрь ойида йил якунлари бўйича матбуот анжуманида ҳарбий ҳисобот эълон қилган эди. Ҳисоботда Украина шарқидаги рус аскарлари сони 617 минг атрофида экани, улардан 244 минг аскар сафарбарлик тўғрисидаги қарордан сўнг уруш майдонига олиб келингани айтилган.
Жорий йилнинг май ойида Россия Украинанинг шимоли-шарқидаги Харьков вилоятига қуруқликдаги йирик ҳужум бошлаши оқибатида аскарлар сони кўпайтирилган. Фронтнинг шимоли-ғарбий ҳудудлари бўйлаб янги ҳарбий қисмлар жойлаштирилган.
Аввалроқ Шарқий Европанинг бир қатор нашрлари ҳалок бўлган аскарлар ҳақида статистика эълон қилган эди. Манбаларда айтилишича, икки йиллик урушдан Россия 50 мингдан ортиқ аскарини йўқотган.
Изоҳ (0)