Статистика агентлиги 2025 йил январда Ўзбекистон томонидан амалга оширилган экспорт-импорт операциялари қийматини маълум қилди.
Жорий йил январда мамлакат ташқи савдо айланмаси ҳажми 4,5 млрд долларни (7,1 фоиз ўсиш) ташкил этди. Шундан экспорт улуши 1,3 млрд доллар (+14,1 фоиз), импорт 3,2 млрд доллар (+4,4 фоиз). Ташқи савдо тақчиллиги 1,9 млрд доллар бўлди.
Қайд этилишича, йирик савдолар Хитой (994,7 млн доллар), Россия (799,1 млн доллар), Қозоғистон (313,5 млн доллар, Туркия (212,9 млн доллар) давлатлари билан амалга оширилган.
Хорижий мамлакатлар билан энг кўп олди-сотди Тошкент шаҳри томонидан бўлган. Пойтахт қарийб 1,9 млрд долларлик (умумий савдонинг 41,7 фоизи) товар ва хизматларни экспорт–импорт қилган. Энг кам ташқи савдо улуши Сирдарё вилояти ҳиссасига тўғри келган — 52,1 млн доллар (1,2 фоиз).
Экспорт кўрсаткичлари
Январда Ўзбекистон экспортининг 37,6 фоизини хизматлар ташкил этди. Мамлакат хорижга ой давомида 492,1 млн долларлик хизматлар сотган (ўсиш 21,9 фоиз). Таққослаш учун, 2024 йилда бу кўрсаткич 403,6 млн доллар эди. Ўтган ойда хизматлар экспорти таркибининг асосий улуши туризм (47,6 фоиз) ҳамда транспорт (37,1 фоиз) билан боғлиқ соҳалар ҳиссасига тўғри келган.
Кейинги юқори улушни саноат товарлари экспорти ташкил этган — 265,5 млн доллар (20,2 фоиз). Шу билан бирга, озиқ-овқат маҳсулотлари ва тирик ҳайвонлар экспорти улуши нисбатан юқори (10,9 фоиз) бўлган.
Гарчи Ўзбекистонда табиий газ тақчиллиги кузатилса-да, мазкур маҳсулот экспорти январда ҳам тўхтатилмаган. Ой давомида хорижга 21,8 млн долларлик газ сотилган. Шунингдек, 17,5 млн долларлик электр токи экспорт қилинган.
Худди 2024 йил январдагидек, жорий йилнинг илк ойида ҳам олтин экспорт қилинмаган. Одатда мамлакат йиллик экспорт тушумининг учдан бир қисми олтин сотувидан келади.
Ўз навбатида республика ўтган ойда 6,6 млн долларлик автомобиллар, 81,7 млн долларлик мева-сабзавот экспорт қилган.
Импорт таркиби
Ўзбекистонга январь ойида энг кўп импорт қилинган товарлар машиналар ва транспорт асбоб ускуналари бўлган. Бир ой давомида мамлакатга жами 1,1 млрд долларлик (умумий импортнинг 35,3 фоиз) мазкур турдаги маҳсулотлар хариб қилиниб, олиб келинган. Ўтган йилнинг мос даврида 1,3 млрд долларлик машиналар ва транспорт асбоб ускуналари сотиб олинганди. Аввалроқ автомобиллар импорти қисқаришига мамлакатга хорижда ишлаб чиқарилган автомобилларни киритишда яратилган сунъий тўсиқ сабаб бўлаётгани айтилган.
Ўтган ойда саноат товарлари импорти ҳам нисбатан юқори улушни (15,8 фоиз) ташкил этган. Январда умумий қиймати 504,8 млн долларлик шундай товарлар чет элдан харид қилинган.
Шунингдек, хориждан 408,6 млн долларлик кимёвий воситалар (12,8 фоиз), 334,7 млн долларлик озиқ-овқат ва тирик ҳайвонлар сотиб олинган.
Январь ойида Ўзбекистонга 144,1 млн долларлик нефть ва нефть маҳсулотлари, 27,8 млн долларлик газ, 21,4 млн долларлик электр токи импорт қилинган. Шу билан бирга, жами қиймати 243,8 млн долларлик автомобиллар харид қилинган.
Умумий импортнинг энг кўп улушлари — Хитой (28,3 фоиз), Россия (16,6 фоиз), Қозоғистон (7,5 фоиз) давлатларидан амалга оширилган.
Маълумот учун, 2024 йилда Ўзбекистон ташқи савдо айланмаси ҳажми 65,93 млрд долларни ташкил этган. Шундан экспорт улуши 26,94 млрд доллар, импорт 38,98 млрд доллар бўлган. Экспорт ва импорт ўртасидаги тақчиллик — 12 млрд долларга етган.
Изоҳ (0)