Россия президенти Владимир Путин сайловларда ғалаба қозониб, яна олти йил бошқарувда қолиши кутилмоқда. У шу тариқа Иосиф Сталин давридан буён Россияни энг узоқ вақт бошқарган раҳбарга айланади.
The Wall Street Journal нашрига кўра, Кремль ҳукумати унинг ғалабасини таъминлаш учун қўлидан келган барча ишни қилди, Жумладан, танқидчиларни қамоққа ташлади, матбуотнинг овозини ўчирди ва Украинадаги уруш ҳақидаги ҳар қандай танқидни йўқ қилиш учун янги қонунлар киритди.
Мавзуга доир: Россиядаги президентлик сайловида Путинга 3 киши рақиблик қилмоқда
WSJ Путиннинг ғалабаси кўлами каттароқ аҳамиятга эгалигини таъкидламоқда. Таҳлилчилар фикрича, Путин шунчаки ғалаба қозонишни истамайди, агар у Россиянинг консерватив православ анъаналарини тиклашга, Украинага қарши урушга ва Ғарб билан кенгроқ қарама-қаршиликка боришга содиқ қолса, у шартсиз ғалаба қозониши керак.
“Бу Путиннинг меросини ва унинг босқинчилик урушини қонунийлаштиради, қолган мухолифатни янада маргиналлашган ролга туширади ва Путинга келгуси олти йил давомида ўз қарашларини тўсқинликсиз амалга ошириш имконини беради”, — дейди Ғарб таҳлилчилари.
Путин нутқлари ва интервьюларида ўзининг баъзи режалари ҳақида аллақачон сигнал юборган, жумладан, Украинадаги урушни давом эттириш шулар сирасига киради.
Кузатувчилар Россия раҳбари тез орада ҳибсга олишларнинг навбатдаги тўлқинини бошлаши, норозиликни бостириш учун янги қонунлар ва бойларга солинадиган солиқларни ошириши мумкинлигини тахмин қилмоқда. Таҳлилчиларнинг айтишича, Россиянинг Украинадаги жанговар устунлигини кучайтириш учун янги сафарбарлик тўлқини ҳам бўлиши мумкин.
Путин Россия иқтисодиётини сақлаб қолиш учун янада нозик балансни излаши кутилмоқда. Таҳлилчилар у русларнинг нормал ҳаёт кечиришини таъминлашга эътибор қаратиш, қашшоқликка қарши кураш ва мамлакатнинг эски инфратузилмасини тиклаш учун миллиардлаб доллар сарфлашини прогноз қилган.
Ўз навбатида, Путин Украинадаги урушда қатнашган ва фахрийларнинг янги элитасини яратиш ҳақида гапириб, уларни янада кўпроқ қўллаб-қувватлаш, жумладан, ўқув имкониятларини яратишга чақирганди. Айни пайтда баъзи таҳлилчилар бундай риторикани “сайлов олдидаги қуруқ ваъдалар” деб баҳолаган. Уларнинг фикрича, ҳақиқатан ҳам Путин жанг майдонида устунликка эришиш учун зарур бўлган сафарбарликнинг иккинчи тўлқинини бошлаши мумкин.
“Россия раҳбари сафарбарликнинг биринчи тўлқини каби юз минглаб россияликларнинг яна мамлакатни тарк этишининг олдини олиш йўлини топиши керак бўлади, масалан, чегарани ёпиш”, — дейди таҳлилчилар.
Россия президенти Европадаги бошқа сайловлар қатори АҚШдаги президентлик сайловлари натижаларини ҳам кутаётган бўлиши мумкин.
“Путин қанча керак бўлса, урушни шунча давом эттиради. У вақт ўзи тарафда эканини ҳис қилмоқда”, — дея хулоса қилади таҳлилчилар.
Изоҳ (0)