Суриянинг амалдаги президенти Аҳмад аш-Шараъа жорий йил сентябрь ойида АҚШнинг Нью Йорк шаҳрида бўлиб ўтадиган БМТ Бош ассамблеясида нутқ сўзлаши кутилмоқда. Бу ҳақда Reuters агентлиги хабар берди.
Қайд этилишича, аш-Шараъа 60 йилдан буён илк бор БМТ минбаридан чиқиш қиладиган Сурия президенти бўлиши мумкин.
У илгари халқаро миқёсда террорчи ташкилот сифатида тан олинган “Ал-Қоида” билан яқин алоқада бўлган. Бироқ аш-Шараъа 2016 йилда улар билан алоқасини бутунлай узган.
Шу йилнинг май ойида АҚШ президенти Дональд Трамп араб давлатларига сафар уюштирган эди. Ўша сафар давомида Аҳмад аш-Шараъа Саудия Арабистонида Трамп билан учрашиш имкониятига эга бўлди.
Трамп Сурия президентига имконият берилишини ва мамлакатга қўйилган санкцияларни бекор қилишга ҳаракат қилишини маълум қилди. Бу эса бир вақтлар қидирувда бўлган, ҳатто боши учун мукофот белгиланган шахснинг халқаро миқёсда президент сифатида қабул қилинишини осонлаштирди.
Маълумот учун, Аҳмад аш-Шараъа 2024 йил 9 декабрь куни Башар Асад режимини ағдариб, ҳокимият тепасига келган. Сурия халқига зулм ва тазйиқ ўтказишда айбланган Асад эса Россияга қочиб кетган.
Изоҳ (0)