Украинанинг ёш аҳолиси мамлакатни тарк этмоқда, дея БМТ Аҳолишунослик жамғармасининг Шарқий Европа ва Марказий Осиё бўйича директори Флоренс Бауэр хабар берди.
Унинг сўзларига кўра, 2022 йил 24 февралдан бери Украинани 10 миллионга яқин аҳоли тарк этган.
“Россия билан урушнинг бевосита қурбонларини ҳисобга олмаганда, бу одамларнинг катта қисми мамлакатни тарк этди. Аҳоли қариб бормоқда, ёшлар эса бошқа жойлардан имкониятлар излаб, мамлакатни тарк этмоқда”, деди Бауэр брифингда.
Жамғарма маълумотларига кўра, Украинада туғилиш даражаси Россия билан можародан олдин ҳам паст бўлган, аммо ҳозир бу дунёдаги энг паст кўрсаткичлардан бири - ҳар бир аёлга тахминан 1 нафардан бола тўғри келади.
Август ойида Украина президенти Владимир Зеленский аҳолининг чиқиб кетиши билан боғлиқ муаммони мавжудлигини айтиб, мамлакатни тарк этган тинч аҳоли билан ишлаш бўйича вазирлик ташкил этилишини эълон қилган эди. Шунингдек, у ёшларнинг четга чиқиб кетиши асосий муаммо бўлиб қолаётганини айтган.
Шу билан бирга, Украина расмийлари ҳали сафарбарлик ёшини 18 ёшга тушириш ниятида эмаслигини таъкидлаган. Украина Мудофаа вазирлиги раҳбари Рустем Умеровга кўра, АҚШ Украина билан мазкур масалани муҳокама қилмоқда.
Изоҳ (0)