5 январь куни Москва вақти билан соат 09:00 атрофида россиялик ҳарбий мухбирлар Украина армияси Суджа марказидан шимолда жойлашган Болшое Солдацкое қишлоғи ва Бердин хутори (кичик қишлоқ) бўйлаб ҳужумга ўтгани ҳақида ёза бошлади. Уларнинг фикрича, Украина қуролли кучлари ярим тунда миналанган майдонларни тозалаб чиққан. Қолаверса, мазкур йўналишда электрон уруш тизимларининг йирик концентрацияси кузатилган.
Бу эса ўз навбатида, Россия армиясининг ФПВ-дронларини амалда самарасиз қилиб қўйди. Тармоқларда тарқалаётган тасвирлар мазкур иддаони тасдиқлайди. Уларда Украина зирҳли техникаларига яқинлашган худкуш дронлар оператор билан алоқани йўқотгани кўринади.
Бироқ оптик тола кебелли дронлар электрон уруш тизимлари учун дахлсизлигича қолмоқда. Бу Украина бўлинмаларига салмоқли талафот етказяпти.
Тармоқларда бу каби тасвирлардан бир нечтасига дуч келиш мумкин. Тасс ахборот агентлиги РФ Мудофаа вазирлигига таянган ҳолда украиналикларнинг 2 та танк ва 12 та зирҳли техникадан иборат ҳужум бўлинмаси Бердин яқинида тор-мор этилгани ҳақида хабар берган.
Бироқ ҳарбий мухбирлар орасида юқоридаги даъволарни инкор қилувчилар ҳам бор. Уларга кўра, Украина армияси “нол нуқтаси”дан 2,68 километр илгарилаб, Бердин хутори ва Новосотницкий посёлкасини эгаллаб олган. Бу ердан Болшое Солдацкое қишлоғигача бўлган масофа тахминан 6 километрни ташкил қилади.
Россия армияси бунга тайёргарлик кўрганмиди?
Ўтган йилнинг август ойидаги амалиётдан фарқли навбатдаги ҳужум Россия армияси учун “сюрприз” бўлмади. “Романов Lite” Telegram канали муаллифи “Украина армияси 20 минг хизматчидан иборат қўшин тўплагани, 7 январга қадар Курск йўналишида қарши ҳужум бошланиши” ҳақида 30 декабрдаёқ огоҳлантириб чиққанди.
Шунга қарамай, Киев мазкур амалиётга қанча қўшин жалб қилгани номаълумлигича қолмоқда. Украина Қуролли кучлари Бош штаби тафсилотларни очиқламаяпти. Бироқ кундалик ҳисоботда 5 январь куни Курск вилоятида ҳарбий тўқнашувлар сони кескин ошгани қайд этилган. Будан бир кун олдин, 4 январь куни кун мазкур йўналишда 33 та ҳарбий тўқнашув кузатилган бўлса, якшанба куни соат 16:00 га қадар 42 таси қайд этилган, 12 та жанг ҳали ҳам давом этмоқда.
Украина Қуролли кучларининг Курск йўналишида жанг қилаётган 116-механизациялашган бригадаси таркибидаги “Кҳорне Group” бўлинмаси ҳам батафсил изоҳ беришдан бош тортди. Украина армиясининг энг жанговар бўлинмаларидан бири ҳужум амалиётлари бораётганини билдириш билан чекланди.
Ҳарбий мухбир Коцнинг таъкидлашича, Украина армияси эътиборни Болшое Солдацкое қишлоғи ва Бердин хуторига қаратиб, асосий кучини бошқа йўналишларга ташламоқчи.
Яна бир уруш тарғиботчиси Юрий Подоляка ҳам унинг фикрини дастаклаб, Украина Қуролли кучларининг Курск вилоятидаги ҳужумларидан мақсад чалғитувчи амалиёт бўлиши мумкинлигини айтди.
Бироқ Курск йўналишида фаол ҳужумларни бошлаган фақат Украина эмас. Россия армияси ҳам Малая Локния, Свердликово, Леонидово йўналишларида жангларни бошлади. Ҳозирча қолган тафсилотлар номаълум.
Мақсад нима?
Покровск йўналишидаги вазият оғирлигича қолмоқда. Россия Қуролли кучлари аллақачон Курахово марказига кириб келди. Киев шахсий таркиб дефицитини қоплаш учун сафарбарлик ёшини 18 гача туширмоқчи. Шундай вазиятда қимматли ресурсларни Курск фронтига ташлаш баҳсли қарор ҳисобланади.
Кузатувчилар бунга ҳарбий аҳамияти бўлмаган сиёсий қадам сифатида баҳо бермоқда. Украина раҳбарияти бўлғуси музокаралардаги позициясини мустаҳкамлашни мақсад қилган бўлиши мумкин. Қўшма Штатларнинг сайланган президенти инаугурацияси тобора яқинлашиб келар экан, ҳар икки томон ўз ихтиёридаги карталар устида иш олиб боряпти.
Изоҳ (0)