Исроил Туркия томонидан Сурия армиясининг тикланишига қарши чиқмоқда. Шунингдек Сурия ҳудудида стратегик қурол-яроғ, жумладан ракеталар ва ҲҲМ тизимлари жойлаштирилишини чеклашни талаб қилмоқда. Бу ҳақда Исроилнинг 12-канали хабар бермоқда.
Манбаларга кўра, бундай қадам, Тель-Авивнинг фикрича, ҳаракат эркинлигини ва Исроил ҳарбий-ҳаво кучларининг минтақадаги ҳаво устунлигини сақлаб қолиш имконини беради.
Шунингдек, битимга друз жамоасини қўллаб-қувватлаш учун Сувайда вилоятидаги Жабал ад-Друзга гуманитар йўлак яратиш, ҳамда Суриянинг Голан тепаликларини қуролсизлантириш тўғрисидаги қоидалар киритилган. Бундан ташқари, ҳужжат вазиятни барқарорлаштириш ва Эрон таъсирини чеклаш мақсадида АҚШ ва араб мамлакатлари кўмагида Сурияни тиклашда халқаро ёрдамни назарда тутади.
Сурия муваққат ҳукумати президенти Аҳмад Аш-Шараа келишув 1974 йилги ажратиш чизиғига асосланиши кераклигини таъкидлаган. Шу билан бирга, Исроил томонидан 1967 йилдаёқ босиб олинган Голан тепаликлари кескинликнинг асосий нуқтаси бўлиб қолмоқда.
“Исроил ўз навбатида хавфсизлигини таъминлашга, жумладан, ҳам Эрон ва “Ҳизбуллоҳ” коалициясига қарши, ҳам ўз чегарасида ИШИД ва “Мусулмон биродарлар ҳаракатларини ўз ичига олган янги радикал сунний блок шаклланиши эҳтимолидан ҳимояланишга интилмоқда”, дейилади хабарда.
Июль ойида Эрон ва Исроил ўртасидаги қуролли можаронинг тугашидан сўнг, Тель-Авив Сурия ва Саудия Арабистони билан муносабатларни нормаллаштириши мумкинлиги хабар қилинганди.
Бирлашган Араб Амирликлари Исроил ва Сурия ўртасидаги музокаралар учун махфий алоқа каналини ташкил этгани хабар қилинганди.
Сурия ва Исроил муносабатлари февраль ойи охирида, Дамашқ яқинидаги Жарамана аҳоли пунктида ўтиш даври ҳукумати хавфсизлик ходимлари ва ўзини ўзи мудофаа кучлари ўртасида тўқнашув содир бўлганида кескинлашди. Исроил шу муносабат билан Суриянинг янги ҳукумати этник-конфессионал озчиликларга босим ўтказаётганини маълум қилди ва қуролли кучларига Суриядаги друзлар жамоасини ҳимоя қилишни таъминлашни топширди.
30 апрель куни Исроил армияси Суриядаги экстремистик гуруҳ ячейкасига зарба берди. Исроил томони радикаллар друз аҳолисига ҳужум қилишни режалаштирганини таъкидлади.
Изоҳ (0)