Олий Рада депутатлари Украина президенти Владимир Зеленскийнинг ҳарбий ҳолат ва умумий сафарбарликни яна 90 кунга — 13 майга қадар узайтириш ҳақидаги фармонини маъқуллади. Владимир Зеленский тегишли фармонни бир кун аввал, 5 февраль куни ҳукумат кўриб чиқиши учун тақдим этганди.
Украинанинг “Страна” нашри хабарига кўра, ҳарбий ҳолат ва сафарбарлик тўғрисидаги фармонни 355 депутатдан 335 нафари қўллаб-қувватлаган, 20 нафар депутат бетараф қолган, қаршилар йўқ.
Украинада ҳарбий ҳолат ва сафарбарлик Россия қўшинлари мамлакатга бостириб кирган кунда — 2022 йил 24 февралда жорий этилганди. Ушбу чора-тадбирлар тўққиз марта узайтирилди, охирги марта 2023 йил ноябрь ойида ҳарбий ҳолат узайтирилган.
2024 йил март ойида Украинада президентлик ва парламент сайловлари ўтказилиши керак эди, бироқ мамлакат конституциясига кўра, ҳарбий ҳолат шароитида уларни ўтказиш мумкин эмас. Владимир Зеленскийнинг ўзи эса украиналикларнинг кўпчилиги бундай шароитда овоз беришни “хавфли ва маъносиз” деб ҳисоблашини айтиб, сайлов ўтказишдан бош тортди.
Изоҳ (0)