Болалар омбудсмани Навоийда мактаб ўқувчилари дарс пайти спорт залга йиғилиб, сочи олингани айтилган хабарларга муносабат билдирди.
“Кун.уз”нинг ёзишича, Навоий шаҳридаги 2-умумтаълим мактабида ўғил бола ўқувчиларнинг оммавий равишда сочини олиш “тадбири” ўтказилган. Манбага кўра, мактаб директори ташаббуси билан мактабга сартарош чақирилган ҳамда турли синфлардан ўғил бола ўқувчилар спорт залга йиғилиб, сочи олинган. Жараённи Миллий гвардия ходимлари ҳам кузатиб турган.
Қайд этилишича, ҳолат Болалар омбудсмани томонидан ўрганилмоқда.
“Мактаб маъмурияти томонидан бундай ҳаракатларга мутлақо йўл қўйиб бўлмайди. Биринчи навбатда, бу умумий ўрта таълим муассасаларининг одоб-ахлоқ қоидаларига зид. Муҳими эса бу боланинг Конституцияда кафолатланган шахсий дахлсизлик ҳуқуқи ҳамда унинг шаъни ва қадр-қиммати ҳурмат қилиниши ҳуқуқига таҳдид солади. Мазкур ҳаракатга йўл қўйган масъулларга нисбатан тегишли чора кўрилиши зарур”, — деб таъкидлайди Болалар омбудсмани.
Ҳозирда бу каби номақбул ҳолатларнинг бошқа таълим муассасаларида ҳам юзага келмаслиги бўйича чоралар кўрилмоқда.
Эслатиб ўтамиз, 2022 йил сентябрда Тошкент шаҳар Мирзо Улуғбек туманида жойлашган 142-сонли мактабда ички ишлар органлари ходимлари, мактаб маъмурияти ҳамда ўқувчилар ўртасида ўтказилаётган профилактик суҳбат жараёни акс этган видео ва фотосурат тарқалиб, кенг муҳокамаларга сабаб бўлганди.
Изоҳ (0)