Ўзбекистонда эндиликда спортчиларни етиштириб чиқарган биринчи мураббийларга ҳам мукофот берилади. Бу ҳақда 13 февраль куни 2028 йилги Олимпия ва Паралимпия ўйинларига тайёргарликни кучайтириш, оммавий спортни янги босқичга олиб чиқиш масалаларига бағишланган видеоселектор йиғилишида маълум қилинди.
Бугунги кунда спортчиларни эришган натижаси учун фақат спорт мактаблари ёки терма жамоа мураббийлари рағбат оляпти. Президент бу адолатдан эмаслигини қайд этиб, эндиликда спортчиларни етиштириб чиқарган биринчи мураббийларга спортчилар ва терма жамоа мураббийлари учун кўзда тутилган рағбатнинг 10 фоизгача қисми мукофот сифатида берилишини таъкидлади.
“Жойларда ёш иқтидорларни аниқлаб, уларни тайёрлайдиган инсонлар — биринчи мураббийлардир”, деди Шавкат Мирзиёев.
Йиғилишда қайд этилишича, спортчи ва параспортчиларни тайёрлайдиган мураббийларга малака сертификати бериш ва уларни қайта тайёрлаш тизими соддалаштирилади.
Энди ҳар бир мактабда яккакураш ва жамоавий олимпия спорт турлари бўйича камида 1 тадан тўгарак бўлиши шартлиги белгиланди. Бунинг учун Спорт вазирлиги ўз тизимидаги барча спорт мактаблари тренерларини умумтаълим мактабларидаги жисмоний тарбия ўқитувчиларига бириктиради.
Федерациялар ҳар бир туманда биттадан умумтаълим мактабини танлаб, ўз йўналишидаги спорт турига мослаштиради. Уларни малакали мураббий ва спорт инвентарлари билан таъминлайди.
Мактаблар ўртасида олимпия спорт турлари бўйича мусобақалар ташкил қилинади. Энг яхши натижа кўрсатган ўқувчилар селексия қилиб борилади, мактаблар эса керакли спорт инвентари билан таъминланади.
Натижа кўрсатган жисмоний тарбия ўқитувчилари алоҳида рағбатлантирилади.
Изоҳ (0)