Ўзбекистонда ҳар йили қатор амалдорлар томонидан айтилиб, “машҳур” бўладиган иборалар учраб туради. Якунига етган 2023 йилда ҳам айрим мансабдорлар айтган гаплар омма орасида муҳокамаларга сабаб бўлди. “Дарё” улардан баъзиларини эслатади.
“Автомобилларга навбат йўқ бўлади...”
Февраль ойида собиқ “Ўзавтосаноат” раиси (23 мартдан Тошкент шаҳар ҳокими) Шавкат Умрзоқов Асака шаҳрида ўтказилган Chevrolet Onix тақдимотида озгина сабр қилинса, автомобилларга навбат йўқ бўлишини айтганди.
“Андижоннинг ўзида бу йил 250−300 млн долларлик тўртта янги завод қурадиган бўлдик. Бу нима беради? Тасаввур қилинг, 2016 йил 80 минг машина чиққан, 2017 йил 120 минг чиққан. Бугун 330 минг чиқаряпмиз. Бу йил 400 мингдан ошиқ чиқарамиз. Навбат йўқ бўлади, ишонинг, фақат озгина сабр (қилинг) ”, — деган у.
Узоқ йиллик навбатлардан чарчаган, оммабоп моделдаги автомобилларни заводдан шартнома асосида сотиб олиши орзу бўлиб қолаётган одамлар бундай гапни озроқ умид, кўпроқ ишончсизлик билан қарши олди. Бу гаплар айтилган пайтда собиқ “Ўзавтосаноат” раисига 2022 йил 1 майгача автомобилларга навбатни йўқотиш топшириғи берилганди. Навбатлар ҳалигача йўқолмади. Умрзоқов эса ҳозирда Тошкент шаҳар ҳокими.
Вазирдан шедевр
Шубҳасиз, февраль ойида жамотчилик учун кутилмаган чиқишлардан бири соғлиқни сақлаш вазири Амрилло Иноятовнинг Фарғонада тиббиёт соҳаси вакиллари ва журналист билан учрашувида содир бўлди.
Тадбирда Иноятов соғлиқни сақлаш тизимидаги раҳбар ходимларнинг маоши ҳақида гапириб, раҳбар-шифокорлардан биридан ойлиги қанчалигини сўраган. Вазир шифокорнинг гапини эшитиб, у айтган 5,5 миллион сўм ойлиги ва унга қўшимча беморлар берадиган ҳақни қўшганда етарлича сумма чиқишига ишонч билдирган.
“Беморни меҳр билан даволасангиз, сўрамасангиз ҳам ўзи рози бўлиб сизга баракасини бериб кетади. Очиқ айтяпман. Етмайдими, деган саволни ўзимизга ўзимиз беришимиз керак”, — деган вазир журналист саволига жавобан.
Антикоррупция агентлиги вазирнинг гапарига муносабат билдириб, шифокорларни рағбатлантириш йўлларидан бири сифатида беморлар берган маблағнинг эътироф этилишини қонунчиликка ва мамлакатда олиб борилаётган коррупцияга қарши курашиш сиёсатига зид ҳаракат сифатида қайд этган. Мазкур таклиф тизимда коррупциявий жиноятлар сонининг ортишига ҳамда шифокор касби мавқеининг пасайишига, соғлиқни сақлаш тизимига халқнинг ишончи камайишига сабаб бўлиши мумкинлиги таъкидланган.
“Шунақаям жинни бўласанми? ”
2023 йил июнда президент маслаҳатчиси ўринбосари Шуҳрат Ғаниев томонидан ўтказилган селектор йиғилишида ғалладан бўшаган ерлар ҳақидаги маълумотларни қўшиб ёзган масъуллар ҳақорат қилинган видео тарқалган.
“Номард, шунчалик ҳам алдайсанми? Хатирчида ҳали 5 минг гектар ғалла ўрилгани йўқ. Жиннику бу. Жинни бўлсанг, сал бир қонунийроқ, фаҳм-фаросати ишлайдиган жинни бўл. Шунақаям жинни бўласанми? Жиннининг жинниси экансанку”, — дея “қўшиб ёзиш”да айбланган мансабдорларни ҳақоратлаган Шуҳрат Ғаниев.
Умуман олганда, Шуҳрат Ғаниев Фарғона вилояти ҳокими лавозимида ишлаган пайтларда оммага “сўконғич ҳоким” сифатида танилган. Унинг 2018 йилдаги йиғилишда тошлоқликларни ҳақоратлагани айтилган аудоси тарқалганди. 2019 йилда эса соқол, рўмол ва иш жойларида намозга қарши чиқиб, бунга бўйсунмаганларни қамаш билан таҳдид қилгани ёзилган аудио тарқалганди. Бу масала Сенатда кўрилган ва собиқ ҳоким “ўтиниб-ўтиниб” кечирим сўраганди.
“Санъат — чегарасиз соҳа”
Жорий йилнинг 3 июлида Маданият ва туризм вазирлигида бўлиб ўтган тадбирда маданият ва туризм вазири ўринбосари Баҳодир Аҳмедов концертдан тушган пулларни Россиянинг Украинага босқинчилигини молиялаштиришга сарфлаётган З-артистларнинг Ўзбекистондаги концертлари нега бекор қилинмаётгани ҳақидаги саволга берган жавоби муҳокамаларга сабаб бўлганди.
“Қайси давлатдан келаётган бўлса, санъатни ҳурмат қиламан, халққа хизмат қиламан, санъатнинг чўққисини кўрсатаман, деб келаётган бўлса ва у ҳақиқий санъаткор бўлса, Ўзбекистон ҳеч қайси санъаткорга эшикни ёпиб, тамбалаб қўйган жойи йўқ. Келяпти, санъатни намойиш қиляпти, олқишини оляпти, кетяпти. Ўзбекистонда санъатга тўсиқнинг ўзи йўқ”, — деган Баҳодир Аҳмедов.
Маданият вазирининг ўринбосари “Х-фактор” шоусини танқид қилгани ҳам кўплаб эътирозларга сабаб бўлган.
“Иштирокчи бир пайтлар “зона”нинг ашулалари дейиладиган қўшиқларини ижро этиб ўтирибди, биттаси шляпани кийиб олиб, ура деб қўллаб-қувватлаяпти”, — деган вазир ўринбосари кўрсатув ҳақида.
Бу фикрларга нисбатан телеканал Instagram даги профилида бунга муносабат билдирган.
“Х-фактор” танлов эмас, аксинча, ҳаваскор ижрочилар ўртасидаги глобал шоу ҳисобланади. Мазкур шоуда қатнашчиларнинг вокал имкониятлари билан бирга уларни саҳнада шоу ярата олиши, ҳакамлар ва томошабинлар эътиборини ўзига қарата олишига ҳам баҳо берилади. Х-фактор шоуси қатнашчилари ҳакамлар томонидан “Ҳа” ёки “Йўқ” деган овоз бериши асосида баҳоланади. Маданият вазирлигининг мулозими таъкидлаганидек, иштирокчилар 10 баллик системада баҳоланмайди ва умуман баллар ишлатилмайди. Шунинг учун, вазир ўринбосари , “Х-фактор” шоусининг ҳеч бўлмаганда 1 та эпизодини тўлиқ кўриб чиқиши ва шундан кейин фикр билдиришини тавсия қиламиз” — дея муносабат билдирилган мулозим чиқишига.
Ҳоким ва директор можароси
Август ойида ижтимоий тармоқларда Сурхондарё вилояти ҳокими Улуғбек Қосимов ва Сариосиё туманидаги 28-мактаб директори Умида Турсунова ўртасидаги можаро акс этган видео тарқалди. Тасвирда ҳоким йиғилишда директорни ишдан бўшатишни буюргани ва ўртада тортишув юзага келгани кўринади.
“Бутун дунёга шарманда бўлдингиз. Жим ўтиринг. Ҳаққингиз йўқ бу мактабда директор бўлиб ишлашга” — деган ҳоким директорга.
Кейин дирекор қамоққа олинган. Воқеа ижтимоий тармоқлар фаолларини “оёққа тургазди”. Сурхондарё ҳокими мансаб ваколатини суиистеъмол қилгани бот–бот таъкидланди. Мактабгача ва мактаб таълими вазири Ҳилола Умарова вазиятга аралашиб, директор қамоқдан озод қилингани, вазир шахсан вазирнинг назоратида эканини маълум қилган.
Умуман олганда, аввалги йиллардаги каби 2023 йилда ҳам юқоридаги ва бошқа бир қатор иқтибослар билан тарихда қолади дейиш мумкин.
Изоҳ (0)