Жаҳон соғлиқни сақлаш ташкилоти (ЖССТ) ёлғизликни инсон саломатлиги учун жиддий глобал таҳдид деб эълон қилди.
Маълум қилинишича, 15 ноябрь куни ЖССТ ижтимоий алоқаларнинг инсонлар саломатлигига таъсирини ўрганиш учун халқаро комиссия тузган. Унга 11 нафар сиёсатчи ва фаоллар кирган. Комиссия уч йил давомида фаолият олиб боради.
Таъкидланишича, одамларнинг ижтимоий фаоллигини тўхтатган COVID-19 пандемияси туфайли ёлғизлик муаммоси оғирлашган, шунинг учун ёлғизлик даражаси ҳам ошган.
“Ёлғизлик чегарадан ошмоқда ва соғлиқ, фаровонлик ҳамда тараққиётнинг барча жабҳаларига таъсир этувчи жамоат саломатлигига глобал таҳдидга айланиб бормоқда. Ижтимоий изоляция ёш ёки чегарани билмайди”, — дейди комиссия ҳамраисларидан бири Чидо Мпемба.
Комиссия ҳамраиси, АҚШнинг бош санитар врачи Вивек Мурти ёлғизликнинг саломатлик учун хатари кунига 15 та сигарет чекиш хавфидан кам эмаслиги ҳамда семириш ва жисмоний фаоллик етишмаслигидан кўпроқ эканини билдирган.
Муртига кўра, ёлғизлик кўпинча ривожланган мамлакатларда муаммо сифатида кўрилади, аммо дунёнинг барча минтақаларида ҳар тўрт нафар кекса ижтимоий жиҳатдан изоляция қилинган.
ЖССТ қўшимча қилишича, дунёдаги ҳар тўртинчи кекса инсон ижтимоий изоляцияни бошдан кечиради, бу ақлдан озиш (деменция) хавфини 50 фоизга ва коронар артерия касаллиги ёки инсульт хавфини 30 фоизга оширади. Тадқиқотларга кўра, дунёдаги ўсмирларнинг 15 фоизи ёлғиз. Улар мактабда ёлғизликни бошдан кечиради ва университетни ташлаб кетиш эҳтимоли кўпроқ.
Сентябрь ойи маълумотларига кўра, Ўзбекистонда ўзгалар парваришига муҳтож бўлган ёлғиз кексаларнинг сони 18 417 нафарга етган. Уларни асосан ёлғизлик, саломатлик ва хавфсизлик масалалари, ҳаракатланиш чекланганлиги, кундалик уй ишларини бажаришда қийинчилик, нотўғри овқатланиш, хотира сусайиши, фирибгарлик ва суиистеъмолларга қарши заифлик, ўз-ўзини парвариш қилолмаслик ва ижтимоий ходимлар томонидан парваришлаш графигининг нотўғри шакллантириш каби муаммолари қийнаб келади.
Изоҳ (0)