Андижон вилояти Олтинкўл туманидаги мактабда ўқитувчи бўлиб ишловчи аёл эри томонидан пичоқлаб ўлдирилгани ҳақида хабарлар тарқалди. Вилоят прокуратураси ҳолат юзасидан маълумотларни очиқлади.
Келтирилишича, 5 февраль куни фуқаро С.М. (эркак) шаърий никоҳидаги турмуш ўртоғи Ж.М. (аёл) билан ўзаро жанжал оқибатида эркак хўжалик пичоғи билан аёлни қасддан ўлдирган.
Мазкур ҳолат юзасидан Олтинкўл тумани прокуратураси томонидан эркакга нисбатан Жиноят кодексининг 97-моддаси 1-қисми билан жиноят иши қўзғатилган ва у процессуал тартибда ушланиб, қамоққа олиш эҳтиёт чораси қўлланилган.
Қайд этилишича, жиноят иши бўйича олиб борилаётган тергов ҳаракатлари алоҳида назоратга олинган. Тергов давомида ишга оид барча ҳолатлар текширилиб, қонуний қарор қабул қилиниши таъминланади.
Оиладаги зўравонлик масаласи
Ўзбекистонда никоҳдан ажратиш тўғрисидаги ишлар кўриб чиқилаётганда зўравонликдан жабрланган шахснинг талабига кўра ярашиш учун муҳлат тайинламаслиги белгиланиши кутилмоқда. Никоҳдан ажратиш масаласи ўз вақтида ҳал қилинмаслиги айрим ҳолларда аёлларнинг ўз жонига қасд қилиши, бевақт ўлими каби аянчли оқибатларни келтириб чиқармоқда.
Бу норманинг амалиётга жорий этилиши мунтазам тазйиқ ва зўравонлик ҳолатлари бўлган низоли оилаларда оғир жиноятлар содир бўлишининг олдини олади. Ушбу қонуннинг қабул қилиниши хотин-қизлар ҳуқуқларини янада мустаҳкамлашга, уларнинг турар жой масалаларини қонуний ҳал қилишга хизмат қилади.
Ўзбекистонда ҳам ҳар учинчи аёл турмуш ўртоғи томонидан ўзига нисбатан зўравонлик содир этилган деб билади.
Шавкат Мирзиёев 2024 йилнинг май ойида ижтимоий хизматлар тизимини янада такомиллаштиришга оид таклифлар тақдимоти билан танишганда ҳар бир аёл учун муносиб турмуш ва меҳнат шароитлари яратиш бўйича қўшимча кўрсатмалар берганди. 2024 йил 1 июндан тазйиқ ва зўравонликдан жабрланган ёки жабрланиш хавфи остида бўлган хотин-қизларга ҳимоя ордери талаб этмаган ҳолда ижтимоий, психологик ва юридик хизматлар кўрсатиш тартиби жорий этилди.
Изоҳ (0)