Тошкентдаги Central Asian University университетида (собиқ Akfa университети) икки йиллик тайёргарлик курсларини тамомлаб, дарҳол иккинчи курсга ўқишга қабул қилинган талабалар билан боғлиқ можаро юз берганди. Олийгоҳ раҳбарияти бунда собиқ ректор — Беҳзод Жалиловни айблаганди. Беҳзод Жалилов бунга муносабат билдириб, қўйилган айбловларни асоссиз деб атади.
Ўзи нима гап?
Университетда 10—11-синф ўқувчиларига мўлжалланган Akfa University Part-Time Student курслари бўлган. 21-сентябр куни ушбу курсларни тамомлаб, бу йил иккинчи курсда ўқишни бошлаган талабалар дарсларга қўйилмаган. Ота-оналар курслар учун 40 миллион сўм (йилига 20 миллион сўмдан) тўлаганларини, шунингдек, шартнома имзолаб, ўқув йили боши учун шартнома суммасининг бир қисмини тўлаб қўйганини маълум қилган.
Central Asian University раҳбарияти ўқувчиларни мактабда ўқиб турган вақтида университет дастурларига қабул қилишни қонунчиликка зид деб атади. Шунингдек, Беҳзод Жалилов асос солган Study for Success компанияси университет маблағларини ноқонуний ўзлаштиришда айбланди.
Беҳзод Жалилов муносабати
Унинг билдиришича, Study for Success 2015 йилдан бери таълим хизматларини (лицензия асосида) кўрсатиб келмоқда ва талабаларни Тошкент шаҳридаги етакчи олий ўқув юртларига ўқишга тайёрлаш билан шуғулланади.
2021 йилдан бошлаб Study for Success республиканинг бошқа кўплаб таълим марказлари сингари университет билан меморандум ва ҳамкорлик шартномаси асосида потенсиал талабаларни университетга, жумладан, Part-time дастури доирасида тайёрлаган ҳамда қабул имтиҳонларини ташкил этган.
“Юқорида қайд этилган ҳужжатларга кўра, Akfa университети International Foundation Diploma for Higher Education Studies дастурини (биз уни Part-time деб атаганимиздек) муваффақиятли тамомлаган талабаларга биринчи босқични ўқимасдан иккинчи босқичга қабул қилинишни кафолатлаган. Сабаби мазкур тайёргарлик курси foundation year’га тенглаштирилган.
Akfa университети муассислари, жумладан, Жаҳонгир Абидович Ортиқхўжаэвнинг ўзи ҳам, таълим муассасасининг бошқа таълим муассалари билан ҳамкорлиги ҳақида хабардор эди. Бундан ташқари, Жаҳонгир Обидовичнинг жияни Ортиқхўжаэва К. ҳам ушбу дастурда ўқиган ва ўқиш пулини университет ҳисобига эмас, балки Study for Success МЧЖ ҳисобига тўлаган. Юқоридагиларни инобатга олсак, муассислар бундан бехабар эди, дейиш нотўғри”, — дейди Беҳзод Жалилов.
Унинг таъкидлашича, Akfa университети ва бошқа ўқув марказлари ўртасида ҳам Study for Success компанияси билан тузилган шартномага ўхшаш ҳужжатлар имзоланган. Шартномаларга кўра, ушбу ўқув муассаларининг курсларини муваффақиятли тамомлаган талабалар Akfa университетининг 2-босқичига қабул қилинган. Бироқ янги раҳбарият томонидан ўрнатилган 2-босқичга тўғридан тўғри ўқишга қабул қилишни тақиқлаш бошқа таълим муассасаларидан Part-time дастури бўйича университетга кирган талабаларга ҳеч қандай тарзда қўлланмаган.
Беҳзод Жалиловнинг айтишича, гарчи юридик мақомга эга ва ҳуқуқий томондан расмийлаштирилмаган бўлмаса-да, ўзини кузатув кенгаши раиси деб таништираётган Абдужаббор Абдувоҳидов билан университет бошқаруви сиёсатида юзага келган келишмовчиликлар туфайли Akfa университети ректори лавозимидан кетган. 2023 йил январь ойининг биринчи ярмида ишдан кетгандан бошлаб 2023 йилнинг 22-сентябрга қадар университетнинг янги раҳбарияти Part-time дастури бўйича ўқув марказлари билан ҳамкорлик бўйича ҳеч қандай эътироз билдирмаган.
Қолаверса, мазкур талабалар 2023 йилнинг баҳорги семестрида университет ҳудудида ҳеч қандай тўсиқларсиз таҳсил олишган ва семестр якунида, яъни 2023 йил июнь ойида университетнинг амалдаги ректори Камрон Ғуломовнинг буйруғи билан кейинги босқичга ўтказилган ёки 2-босқичга ўқишга қабул қилинган. Мазкур буйруқ асосида Study for Success талабалари университетнинг 2-босқичига ўқишга қабул қилинганликлари тўғрисида хабардор қилинган.
22-сентябр куни бўлиб ўтган ота-оналар билан учрашувда, Камрон Ғуломов бундай буйруқ борлигини аввал рад этган. Буйруқ унга кўрсатилгач, у нимага имзо қўйганидан хабари йўқлигини айтган. Кейинчалик эса, у буйруққа имзо алдов йўли билан олинганини айтган.
“Аслини олганда, бу масалани янги раҳбарият фақат менинг обрўмга, Study for Success обрўсига ва ҳозирда мен фаол иш олиб бораётган янги университет ташкил қилиш бўйича янги лойиҳанинг обрўсига путур етказиш учун кўтарган. Агар уларнинг айбловлари мантиқий ва қонуний асосли бўлса, унда мантиқий савол туғилади: нега университетнинг янги раҳбарияти ишдан бўшатилганимдан бошлаб 2023 йил 22 сентябргача Part-time дастурини ёпиш ва таълим марказлари билан ҳамкорликни тўхтатиш масаласини кўтармади?” — дейди Беҳзод Жалилов.
Унинг қайд этишича, 2022 йил ноябридан бошлаб, шунингдек, ишдан бўшатилганидан сўнг таъсисчи вакиллари томонидан ташқи экспертларни жалб қилган ҳолда университет фаолиятида қайта-қайта аудит, жумладан, молиявий аудит ўтказилган. Ушбу текширувлар натижасида ҳеч қандай қонунбузарликлар аниқланмаган.
Университетда ишлаб юрган пайтида Абдужаббор Абдувахитов билан ўрталарида тез-тез низолар юзага келган. Шундай можаролардан бирида Абдужаббор Абдувоҳидов Беҳзод Жалиловга нисбатан беҳаё сўзларни ишлатиб, ҳамкасблар олдида шаъни ва қадр-қимматимни камситган, ҳатто жисмоний зўравонлик билан таҳдид қилган.
Видеоси интернетда кенг тарқалган Central Asian University’да 21-сентябр куни ташкил этилган ота-оналар мажлисида Абдужаббор Абдувахитов ота-оналарни унга қарши прокуратурага ариза ёзишга чақирган ва хаттотки ота-оналарни прокуратурага олиб бориш учун автобус хизматини ташкил қилган. У, шунингдек, Беҳзод Жалилов танишларига, университет ходимларига ва Akfa бош офиси ходимларига мени жиноий муассасага (қамоққа) жойлаштирмагунча тинчланмаслигини айтган.
“Абдужаббор Абдувоҳидов ўз алоқаларидан фойдаланиб, прокурорларни менга нисбатан жиноий иш қўзғатишга том маънода мажбурлаган. Май ойида мени прокуратура сохта айблов, яъни университет маблағларини ўғирлаш бўйича бир неча бор сўроқ қилишди. Бу айбловлар исботини топмади. Июнь ойида ҳуқуқ-тартибот идоралари ходимлари менинг диний ва сиёсий экстремистик исломий ҳаракатларга алоқадорлигим юзасидан текширув ўтказдилар. Бироқ бу айблов ҳам тасдиқланмади”, — дейди Беҳзод Жалилов.
Унинг таъкидлашича, Абдужаббор Абдувахитовнинг ягона мақсади унинг обрўйига доғ тушириш, фаолиятга зарар етказишдир. Бошқалар ишга қабул қилинмасликлари учун Абдувохитов у ҳақида ёлғон маълумотлар тарқатган.
“Абдужаббор Абдувахитовдан университет ривожига эътибор қаратишни, университет номи ўзгарганлиги сабабли бекор қилинган лицензияни қайтадан олишга, университетнинг собиқ ходимларининг лойиҳаларини ривожлантиришга қарши чиқиб, зарар-кундалик билан шуғулланмасликни сўрайман. Ёдингизда бўлсин, халқда жуда доно нақл бор: ‘Ким бировга чоҳ қазиса ўзи тушади’. Мен Абдужаббор Абдувахитов менга қўйилган асоссиз барча айбловлар ва ҳақоратлар учун омма олдида кечирим сўрашини талаб қиламан”, — дейди Беҳзод Жалилов.
У, шунингдек, Шавкат Мирзиёевдан Ўзбекистон ҳудудида ўзи ва оиласи хавфсизлиги таъминланишини сўради.
Изоҳ (0)