Ijtimoiy tarmoqlarda noma’lum shaxs tomonidan Toshkentdagi 71-maktab o‘quvchilari xavfsizligiga tahdid qilingan xabarlar tarqaldi. Maktabgacha va maktab ta’limi boshqarmasi holat yuzasidan izoh berdi.
Qayd etilishicha, Mirzo Ulug‘bek tumanidagi 71-sonli umumta’lim maktabida ta’lim jarayonlari boshqarma tomonidan to‘liq nazoratga olingan. Bugun maktabning birinchi va ikkinchi navbatidagi darslar belgilangan jadval asosida o‘tkazildi.
Yuqoridagi anonim yozilgan xabar o‘z isbotini topmadi. Maktab ma’muriyati, milliy gvardiya, psixolog-inspektor ota-onalar va o‘quvchilar bilan tushuntirish ishlarini amalga oshirib, bu kabi asossiz xabarlarga ishonmaslikka hamda doimo hushyor bo‘lishga chaqirgan.
Maktabdagi janjallar
Avvalroq Sirdaryoda o‘qituvchi 1-sinf o‘quvchisini qo‘liga igna sanchish bilan jazolangani haqida xabarlar tarqalgandi. Surishtiruv davomida yuqoridagi holat tasdig‘ini topmagan.
Qashqadaryoning Shahrisabz tumanidagi maktabda o‘qituvchi 5-sinf o‘quvchisini urib jarohatladi. Qarshi shahridagi maktabda o‘qituvchi va o‘quvchi yoqalashgani tasvirlari tarqaldi. Algebra fani o‘qituvchisi va 10-sinf o‘quvchisi bo‘lgan ikki qiz o‘rtasida o‘zaro kelishmovchilik kelib chiqib, og‘zaki tortishib qolgan. Ularning xatti-harakatlariga chora ko‘rish uchun sudga berilgan.
Toshkentdagi maktabda ayol dastlabki ish kunida o‘quvchini kaltaklagani ham keng muhokamalarga sabab bo‘lgandi. Ayol jazolanib, maktab direktori ishdan olingandi.
O‘qituvchiga tazyiq o‘tkazish holatlari
2024-yilning oktyabrida Sirdaryo tumanidagi 2-maktabda ikki o‘quvchi qiz o‘qituvchini urgandi. O‘sha yilning aprelida Farg‘onada maktab o‘qituvchisi o‘quvchining qarindoshlari tomonidan kaltaklangandi. 2023-yilning mayida Farg‘ona viloyati Toshloq tumanidagi maktabning boshlang‘ich sinf o‘qituvchisi o‘quvchisining onasi tomonidan kaltaklangandi. Sentyabr oyida Surxondaryoda maktab direktori o‘qituvchining yaqin qarindoshlari tomonidan kaltaklangandi. Mazkur holatlar yuzasidan huquqbuzarlarga qilmishidan kelib chiqqan holda jazo choralari ko‘rilgan.
Qonunchilikka ko‘ra, jamoat tartibiga yoki xavfsizligiga tahdid soluvchi yolg‘on axborotni tarqatgan shaxs BHMning 100 baravarigacha (37 mln 500 ming so‘mgacha) jarimaga tortilishi mumkin.
Shuningdek, yolg‘on axborot tarqatganlik uchun ma‘muriy javobgarlikka tortilgan shaxs ushbu huquqbuzarlikka takroran yo‘l qo‘ysa, quyidagi jazo choralaridan biri qo‘llanilishi mumkin:
- BHMning 200 baravarigacha (75 mln so‘mgacha) miqdorda jarima;
- 300 soatgacha majburiy jamoat ishlari;
- 2-yilgacha axloq tuzatish ishlari;
- 2-yilgacha ozodlikni cheklash.
Izoh (0)