Бир йил олдин 2022 йил 23 июнь куни 80 йилларнинг кумири Юрий Шатунов юрак хуружидан вафот этди. Афсонавий “Оқ атиргуллар”, “Оппоқ тун” ва “Болалик” қўшиқлари ижрочиси концертларида минглаб одамларга қувонч улашган ва болалик соғинчини ёдга солган.
Бугун уни афсонага айлантирган Юрийнинг ҳаётидаги асосий воқеаларни эслаймиз.
Қийин кечган болалик
Юрий 1973 йил 6 сентябрда Бошқирдистоннинг Кумертау шаҳрида туғилган. Орадан ҳеч қанча вақт ўтмай отаси Василий Клименко хотинини Вера Шатуновани янги туғилган чақалоғи билан ташлаб кетади. Айнан шунинг учун онаси ўғлига ўз фамилиясини беради.
Вера Гавриловна яна бахтини топишга уриниб, иккинчи марта турмушга чиққанида кичкина Юрий ўгай отаси билан тил топиша олмай, уйдан қочиб кета бошлайди. Айтишларича, Веранинг янги турмуш ўртоғи ичкиликка берилган ва жаҳлдор одам бўлган.
Бўлажак артист бир неча йил давомида Старая Отрада қишлоғидаги холаси Нина Долгушинанинг уйида яшайди ва ўша ердаги маҳаллий мактабга боради. Меҳр етишмаслиги ва оиласи билан бирга яшамаслигига қарамай, Шатунов бошқаларга жаҳл қилмасди, мактабда ҳар доим ҳамманинг кайфиятини кўтарарди — синфдошлари билан ҳазиллашарди, дарсда ҳам уларни кулдириб ўтирарди.
“У ҳар доим жилмайиб турарди, ҳақиқатан ҳам унинг табассуми ҳаммани ўзига тортарди. Болалигидан у оддийгина йигит эди, синфдаги ҳамма билан дўст эди, шунчаки шумтака бола эди”, — деб эслайди биринчи ўқитувчиси Галина.
Ўқитувчиси, шунингдек, Шатунов мусиқага доим меҳр қўйгани, эшитиш қобилияти кучли бўлгани, чолғу асбобларини осон ўзлаштиргани, аммо рус тили ва математика дарсларига қизиқмаганини айтади.
1982 йилда Юрийнинг онаси шахсий ҳаётини йўлга қўйиб олиш учун ўғлини мактаб-интернатга беради, аммо икки йилдан кейин у юрак етишмовчилигидан вафот этади. Дўстларининг айтишича, Вера Гавриловнанинг соғлиғига спиртли ичимликларни кўп ичиш таъсир қилган.
Шатуновнинг синфдоши болалигининг бахтли дақиқаларини у билан бирга ўтказганини айтади:
“Биз бирга шиша йиғишга борардик, кейин уларни топширардик. Шифохона яқинидаги ширинлик заводига кирардик, у ерда пряникка қўшиладиган сироп бўларди — шу сиропни ердик. Кечаси тартибни сақлаш учун тарбиячилар қўйиларди. Улар хоналарни айланиб юришарди. Агар кимнингдир ухламаганини кўришса, жисмоний машқ қилишга мажбурлашарди”.
Бир оз вақт ўтгач, холаси Нина Юрийни ўз қарамоғига олади, лекин боланинг у билан муносабатлари ёмонлашади ва яна уйдан қоча бошлайди. Деярли бир йил давомида Юрий Бошқирдистон ва Оренбург кўчаларини кезиб чиқади. Шундан кейин у Оренбургдаги болалар уйига топширилади ва ўша ернинг бошлиғи Валентина Николаевна Тазекеновага (кейинчалик унинг васийси бўлади) бириктирилади. Икки йил ўтгач, аёл 2-сонли мактаб-интернатга директор этиб тайинланади, Юрий ҳам12 ёшида у билан бирга ўша ерга кўчиб ўтади.
Улар менга “Шу болани тарбиянгга ол, унинг исми Шатун — кўчама-кўча дайдиб юради”, дейишди. Унинг ўзидан “Акбулакдаги болалар уйига борасанми?” деб сўрадим. Мени у ерга директор қилиб тайинлашганди. У “Бораман, у ерда мени уришмайди, дейишяпти”, деди. Шундан кейин уни олиб кетдим, — дейди Валентина.
Шатунов болалигини эслашни истамайди, бу ҳақда гап кетса, болалиги бўлмаганини айтади:
“Буни ҳис қилмаганман. Болалигим мактаб-интернатда ўтди. У ерда орзу қилиш мумкин бўлган ягона нарса — тезроқ ва кўпроқ овқат беришларига умид қилиш эди.
Машҳурлик
1986 йилда Юрий Сергей Кузнецов томонидан Оренбургда ташкил этилган “Ласковий май” гуруҳининг солисти бўлади. Уларнинг қўшиқлари тез орада барча дискотека ва кўчаларда янграйди. Гуруҳнинг мухлислари кундан кунга ошиб бораверади.
1991 йилда Қўшма Штатлар бўйлаб гастрол чоғида Шатунов ўзини “етимхона боласи” каби ҳис қилишдан чарчаганлиги сабабли гуруҳни тарк этишга дадил қарор қилади. Айнан ўша пайт мусиқачига кутилмаган омад кулиб боқади — концерт ташкилотчилари унинг рақамини топиб, Германияда қўшиқ айтишни таклиф қилишади.
Шундан сўнг омад яна унинг томонида бўлади — у овоз режиссёри сифатида ўқийди, клипларда рол ўйнай бошлайди, 2007 йилда Мюнхенда севгилиси — Светлана билан турмуш қуради. 2006 йилда ўғли Денис, бир йилдан кейин қизи Эстелла дунёга келади. 2009 йилда эса Юрий “Болалик” қўшиғи учун “Йил қўшиғи” мукофотига сазовор бўлади.
Разин билан зиддият
Шатуновнинг атрофидаги танишларининг айтишича, “Ласковий май” студияси асосчиси ва Юрийнинг ўғлига чўқинтирган ота бўлган Андрей Разин билан судгача борган зиддиятлар унинг соғлиғига таъсир қилган бўлиши мумкин. У билан Юрий бир неча йил давомида гуруҳнинг барча қўшиқларига бўлган ҳуқуқлар учун курашади, (гарчи Разин гуруҳни анча олдин тарк этган бўлса ҳам).
2022 йил июнь ойида Ставропол суди “Ласковий май” қўшиқларига бўлган ҳуқуқлари бўйича Разиннинг даъвосини рад этади ва Шатунов тарафини олади. Ушбу қарордан кейин Разин Юрийга таҳдид қила бошлайди, аммо бу Юрийни қўрқитмайди.
Юрий ғалаба қозонганига қарамай, бу қувончли воқеанинг хурсандчилиги узоққа чўзилмади. Бир ҳафта ўтгач, Москва яқинидаги Растуново қишлоғида дўстлари билан дам олаётган мусиқачининг юраги хуруж қилади. Шатунов 49 ёшида ўзининг орзуси — кўришни жуда хоҳлаган набираларига бобо бўлолмай вафот этади.
“Ўша мудҳиш кундаги воқеалар хотирамда бирин-кетин жонланади. Бу ҳақда кўз ёшларсиз гапириш қийин. Мен ҳали ҳам Юрийнинг эшик қўнғироғини босишини ва: “Мана, мен уйдаман, азизларим”, дейишини кутяпман. Оғриқ сусаймайди. Вақт даволамайди”, — дейди мусиқачининг беваси Светлана.
Изоҳ (0)