Ёқилғи-энергия ресурсларидан ноқонуний фойдаланиш ҳолатларини фош этишга қаратилган тадбирлар давом этмоқда.
Хусусан, Қашқадарё вилояти Косон туманида яшовчи фуқаро Ш.С. хонадонидаги иссиқхонани табиий газ тармоғига яширин равишда улаш орқали фойдаланиб келиши оқибатида 654 млн сўмлик табиий газни талон-торож қилган. Бу ҳақида Бош прокуратура хабар қилди.
Шу каби, мазкур туманда яшовчи Ш.А.нинг хонадонидаги иссиқхонада 159 млн сўм ҳамда А.А.нинг иссиқхонасида 243 млн сўмлик табиий газ талон-торож қилинганлиги аниқланган.
Мазкур ҳолатлар юзасидан Жиноят кодексининг 169-моддаси тегишли бандлари билан жиноят иши қўзғатилган.
Газ ўғирлаётган оҳак цехлари
Март ойида Самарқанд вилоятининг Пахтачи туманида 4 млрд сўмлик табиий газдан ноқонуний фойдаланилган яширин оҳак цехи фош этилган эди. Апрелда эса Фарғонада 69,4 млн сўмлик табиий газдан ноқонуний фойдаланган оҳак цехи аниқланган.
Май ойида эса яна Фарғонада 289 млн сўмлик табиий газдан ноқонуний фойдаланиб, оҳак цехи ташкил этилганлиги аниқланган эди. Август ойида Самарқандда 3,3 млрд сўмлик табиий газдан ноқонуний фойдаланиб, оҳак цехи ташкил этган шахс ушланганди.
Сентябрда Фарғонада газдан ноқонуний фойдаланган оҳак цехи масъуллари давлатга 5,5 млрд сўмдан зиёд зарар етказди. Шу билан бирга, айнан Фарғона шаҳрида ноқонуний оҳак ишлаб чиқариш цехи ташкил қилиб, 544,6 млн сўмлик табиий газни ўғирлаганлар қўлга тушган эди.
Газдан ноқонуний фойдаланган новвойхоналар
Аввалроқ Намангандаги новвойхонада 273 млн сўмлик табиий газдан ноқонуний фойдаланилгани аниқланган эди.
Шунингдек, Жиззахда қарийб 700 млн сўмлик газдан ноқонуний фойдаланган новвойхона аниқланган. Бундан ташқари, Фарғона вилоятида 5 та новвойхона томонидан 771 млн сўмдан зиёд табиий газдан ноқонуний фойдаланиш ҳолатлари аниқланганди. Шу билан бирга, Урганч туманида 2 миллиард сўмдан зиёд табиий газдан ноқонуний фойдаланган МЧЖ аниқланди.
Бундан ташқари, Самарқанддаги новвойхонада 621 млн сўмлик газдан ноқонуний фойдаланилди.
Газ ўғирлаётган иссиқхоналар
Тошкент вилоятида 618,4 миллион сўмлик табиий газдан ноқонуний фойдаланган иссиқхона аниқланганди. Шунингдек, Самарқандда 1 миллиард сўмлик табиий газдан ноқонуний фойдаланган иккита иссиқхона фош бўлгани тўғрисида хабар берилганди.
Бундан ташқари, Тошкентда 590 млн сўмлик газдан ноқонуний фойдаланган иссиқхона аниқланган. Кейинроқ эса Наманганда иссиқхонада миллиардлаб сўмлик табиий газдан ноқонуний фойдаланилган.
Изоҳ (0)