“Ўзэнергоинспекция” томонидан 2024 йил давомида ўтказилган назорат тадбирларида 8 289 та табиий газ ва электр энергиясидан ноқонуний фойдаланиш ҳолатлари аниқланди. Бу ҳақда инспекция матбуот хизмати хабар берди.
Маълум қилинишича, мазкур ноқонуний фойдаланишлар натижасида давлат манфаатларига жами 1 трлн 409 млрд сўм зарар етказилган.
Унга кўра, электр энергияси бўйича 730,1 млрд сўм (91 та майнинг, 184 та АГТКШ, 1 422 та сув насоси) ва табиий газ бўйича 679,1 млрд сўмлик ( 57 та АГТКШ, 64 та иссиқхона, 5 та оҳак цехи) энергия ресурслари талон-торож қилингани маълум бўлди.
Ўрганишлар давомида қоидабузарликка йўл қўйган 51 та автомобилларга газ тўлдириш компрессор шохобчасининг лицензияси бекор қилинди.
Шунингдек, истеъмолчилар томонидан энергия ресурсларидан фойдаланиш қоидаларини бузиш билан боғлиқ ҳуқуқбузарликлар бўйича 9 084 та маъмурий иш расмийлаштирилди.
Нефть маҳсулотлари бўйича олиб борилган сифат назорати тадбирларида АЁҚШ ва корхоналардан олинган таҳлил наъмуналаридан 189 та ҳолатда 5 млн 348 минг литр нефть маҳсулоти сифасизлиги аниқланиб, сотувга чиқарилиши олди олинди.
Ёқилғи-энергия ресурсларидан самарали ва оқилона фойдаланиш бўйича 47 минг 396 та истеъмолчиларга профилактика тадбири ўтказилди.
Изоҳ (0)