Андижон вилоятида қуввати 400 МВт бўлган қуёш фотоэлектр станциясини қуриш Хитойнинг PowerChina International Group Limited компанияси томонидан амалга оширилади. Бу ҳақда “Дунё” агентлиги хабар берди.
Энергетика вазирлиги маълумотига кўра, май ойида Хитойга бўлиб ўтган олий даражадаги ташриф доирасида Ўзбекистон энергетика вазирлиги билан PowerChina International Group Limited компанияси ўртасида Андижон вилоятининг Андижон туманида қуввати 400 МВт бўлган қуёш фотоэлектр станциясини қуриш бўйича англашув меморандуми имзоланган.
Ушбу ҳужжатга асосан 31 июль куни Энергетика вазирлиги, Андижон вилояти ҳокимияти ва PowerChina International Group Limited компанияси ўртасида лойиҳани амалга оширишнинг асосий шартларини белгиловчи шартнома имзоланган.
Мазкур шартномага мувофиқ қуйидаги ишлар амалга ошрилади:
- лойиҳа доирасида 2023 йилнинг сентябрь ойида қурилиш ишлари бошланиши, қуёш фотоэлектр станциясининг дастлабки 100 МВт қуввати 2024 йил 1 апрелга қадар ва тўлиқ қуввати 2024 йил 30 ноябрга қадар ишга туширилиши режалаштирилган;
- мазкур қуёш фотоэлектр станцияси ишга тушгач, йилига 700 миллион киловатт соат электр энергияси ишлаб чиқарилади, 212 миллион куб метр табиий газ тежалади ва атмосферага 294 минг тонна зарарли иссиқхона газлари чиқишининг олди олинади.
Таъкидланишича, ушбу лойиҳа учун қишлоқ хўжалиги маҳсулотларини етиштиришда фойдаланилмайдиган ер майдонлари танланган.
PowerChina International Group Limited компанияси 2016 йилда халқаро лойиҳалар учун ташкил этилган. У бугунги кунга қадар умумий 200 ГВт қувватга эга лойиҳаларни амалга оширган. Компания 2019 йилда 50,5 миллиард доллар, 2020 йилда 58,2 миллиард доллар ва 2021 йилда 69,5 миллиард доллар миқдорида айланма маблағларга эга бўлган.
Хитойнинг “Sinxua” давлат ахборот агентлиги маълумотига кўра, Хитойнинг Шеньси провинцияси маъмурий маркази Сиан шаҳридан Ўзбекистонга фотоэлектрик элементлар юкланган поезд йўлга чиққан. Юк поездига Ўзбекистонда 1 ГВт қувватга эга фотоэлектр лойиҳаси учун маҳсулотнинг биринчи партияси бўлган 50 та контейнер 20 МВт қувватга эга фотоволтаик элементлар юкланган.
Қуёш фотоэлектр станцияларининг қурилиши
Ўзбекистонда 2021 йилнинг май ойида Самарқанд вилоятининг Каттақўрғон тумани ва Жиззах вилоятининг Ғаллаорол туманида ҳар бири 220 МВт қувватга эга иккита янги қуёш электр станциясини давлат-хусусий шериклик доирасида қуриш бўйича тендер ғолиби эълон қилинганди. БААнинг қайта тикланадиган энергия соҳасидаги Masdar компанияси мамлакатда ва Марказий Осиё минтақасида электр энергияси ишлаб чиқаришга энг паст тарифларини таклиф қилган.
Самарқанд ва Жиззах вилоятларидаги қуёш электростанциялари йилига 1,1 миллиард кВт/соатгача қайта тикланадиган электр энергияси ишлаб чиқариш имкониятига эга бўлади. Уларнинг ишлаши туфайли йилига ўртача 110 минг тонна ёки уларнинг бутун хизмат даври давомида жами 3,4 миллион тонна карбонат ангидрид эмиссиясининг олди олинади.
Ушбу лойиҳа “Қуёш энергетикасини кенгайтириш” дастури кўмагида амалга оширилмоқда. Унинг доирасида аввалроқ IFC тендер ўтказиш бўйича маслаҳат хизматларини кўрсатган, Жаҳон банки эса станциялар томонидан ишлаб чиқарилган электр энергиясини сотиб олиш бўйича жами 12 миллион АҚШ долларигача бўлган (ҳар бири учун 6 миллион АҚШ долларидан) мажбуриятларни бажариши учун банк кафолатларини тақдим этади.
Қуёш электростанцияларини ишга тушириш учун Masdar лойиҳа компанияларига ўз капиталидан 193 миллион доллар инвестиция киритади. Masdar, шунингдек, Осиё тараққиёт банки, Европа тикланиш ва тараққиёт банки, Европа инвестиция банки ҳамда Осиё инфратузилма инвестициялари банки томонидан 216 миллион доллар қарз маблағларини жалб қилади.
Изоҳ (0)