Испан олимларининг бир гуруҳи экспедиция давомида Антарктида ер қаърида катта миқдордаги метан чиқиндиларини аниқлаганини маълум қилди. Бу ҳақда El Pais нашрига таяниб, ТАСС хабар бермоқда.
Геологлар Рикардо Леон ва Роже Урхелесдан иборат олимлар гуруҳи Sarmiento de Gamboa кемасида бўлган пайтларида океанда узунлиги 700 метр ва кенглиги 70 метргача бўлган метан чиқиндиларини кузатишган. Нашрнинг таъкидлашича, бу чиқиндилар “сайёра иқлими учун хавфли омил” бўлиши мумкин.
Олимлар экспедицияга 12 январь куни йўл олишган. Нашрга кўра, ушбу бирикма тахминан 20 минг йил олдин денгиз тубида органик моддаларнинг метан гидратлари кўринишида парчаланиши натижасида тўпланган.
Биз бу ҳудудда метан гидратларида тўпланган 24 гигатонна углерод борлигини ҳисобладик, бу бутун инсониятнинг икки йиллик чиқиндиларига тенг келади, дея аниқлик киритди геолог.
Газетанинг ёзишича, музлатилган қаттиқ метан газга айланмоқда. Бундай ҳодисалар Арктикада аллақачон кузатилган, аммо Антарктидада улар биринчи марта қайд этилмоқда.
Олимларнинг натижалари ҳозирча дастлабки бўлса-да, газ ер қаъридан ер ёриқлари бўйлаб сизиб чиқаётганини тахмин қилинмоқда.
Испан олимлари, шунингдек, денгиз чўкиндиларининг беқарорлиги қитъа ёнбағрида цунамига сабаб бўлиши мумкин бўлган улкан кўчкиларни келтириб чиқариши мумкинлигидан огоҳлантирдилар.
Метан гидратлари газга айланганда, улар 160 баравар кўпроқ ҳажмни эгаллайди. Агар у тезда тарқалиб кетмаса, бу катта кўчкиларга олиб келиши мумкин, деб тушунтирди мутахассислардан бири.
Изоҳ (0)