“ОКМК корхоналарини техник қайта қуроллантириш” дастурига кўра, Оҳак заводида қувурли айланма печининг 2-тармоғи барпо этилди.
Ушбу объектнинг тантанали очилиш маросими жорий йилнинг 14 февраль куни бўлиб ўтди. Тадбирда ОКМК раҳбарияти, таркибий бўлинмаларнинг раҳбарлари, меҳнат фахрийлари ва ишчи-ходимлар иштирок этишди.
Тадбирда сўз олган Олмалиқ кон-металлургия комбинати бошқарув раиси Абдулла Хурсанов, комбинатда амалга оширилаётган инвестисиявий лойиҳаларнинг аҳамияти ҳамда ушбу печнинг ишлаб чиқариш занжиридаги роли катта эканлигини таъкидлаб ўтди. Печ қурилишида иштирок этган комбинат таркибий бўлинмалари меҳнат жамоаларига ўз миннатдорчилигини билдирди.
Шунингдек, тадбирда сўз олган меҳнат фахрийлари ва меҳмонлар ҳам янги иншоотнинг комбинат ривожида муҳим аҳамият касб этишини таъкидлашди.
Тадбирда печ қурилишида иштирок этган комбинат таркибий бўлинмаларининг бир гуруҳ ишчи-ходимлари қимматбаҳо совғалар билан рағбатлантирилди.
Шундан сўнг, Оҳак заводи директори томонидан печ ишга тушишга тайёр эканлиги маълум қилиниб, печ ишга туширилди ва дастлабки оҳак маҳсулотини ҳам олинди.
Маълумки, маъданларни бойитишда оҳак муҳим реагент ҳисобланади. ОКМК бойитиш фабрикаларида ҳам уни кенг қўллашади. Шунингдек, Рух ва Мис эритиш заводларида сулфат кислота ишлаб чиқаришда нейтралаштириш учун оҳакдан фойдаланилади.
Комбинатда ишлаб чиқариш қувватларининг кенгайиши натижасида оҳакка бўлган эҳтиёж ҳам кундан-кунга ошиб бораяпти. Ушбу омилларни ҳисобга олган ҳолда янги барпо этилган мазкур печ комбинатда ишлаб чиқариш қувватларининг кенгайиши натижасида оҳакка бўлган эҳтиёжни тўлиқ қондиради. Эътиборлиси, печ комбинатнинг ўз кучи ва маблағлари эвазига қуриб битказилди.
Печнинг деярли барча деталлари маҳаллийлаштириш дастури асосида Марказий таъмирлаш механика заводида тайёрланди.
Бугунги кунда комбинатда оҳакка бўлган эҳтиёж суткасига 360 тоннани ташкил этишини ҳисобга оладиган бўлсак янги печнинг ишга туширилиши эҳтиёжни тўлиқ қондиради. 1 суткада оҳак ишлаб чиқариш 480 тоннага етказилади. Йилига эса янги печда 85 минг тонна оҳак ишлаб чиқарилади.
Янги печ тўлиқ автоматлаштирилган бўлиб, унинг иқтисодий самарадорлиги юқори саналади.
Газ ва электр энергияси сарфи ҳам тўлиқ назоратда бўлиб, маҳсулот сифати юқори бўлишини таъминлайди. Мазкур печ жараёнда ҳосил бўладиган чангни ушлаб қолувчи замонавий аспирасион тизимлар билан жиҳозланган.
Яна бир эътиборга молик жиҳат ушбу печнинг ишга тушиши натижасида 51 та янги иш ўрни ҳам яратилди.
Реклама ҳуқуқи асосида.
Изоҳ (0)