Samarqand viloyatida ikkita issiqxona tabiiy gazdan noqonuniy foydalanishi natijasida tizimga 1 milliard so‘mdan ziyod zarar yetkazilgani aniqlandi. Bu haqda “O‘zenergoinspeksiya” matbuot xizmati xabar berdi.
Qayd etilishicha, Bosh prokuratura huzuridagi departament, IIB, “O‘zenergoinspeksiya” va gaz taʼminoti korxonasi xodimlari bilan hamkorlikda Samarqand viloyatida o‘tkazilgan nazorat tadbirlarida tabiiy gazdan noqonuniy foydalanish holatlari aniqlanmoqda.
Xususan, Pastdarg‘om tumani, “Nayman” MFYda istiqomat qiluvchi fuqaro G‘.X. o‘ziga qarashli issiqxonaga hech qanday hujjatsiz tijorat maqsadida 20 dona qo‘lbola usulda yasalgan isitish uskunasini o‘zboshimchalik bilan o‘rnatib, jami 688,9 million so‘mlik tabiiy gazdan noqonuniy foydalangani aniqlangan.
Shuningdek, “Qozoq-Nayman” mahallasida istiqomat qiluvchi fuqaro X.Sh. o‘ziga tegishli issiqxonada qo‘lbola usulda yasalgan isitish uskunalarini o‘rnatib, 329,6 million so‘mlik tabiiy gazdan noqonuniy foydalangani ma’lum bo‘lgan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Aprel boshlarida Surxondaryo viloyatining Denov, Qashqadaryo viloyatining Muborak hamda Farg‘ona viloyatining Marg‘ilon shahrida gazdan noqonuniy foydalanish holatlari fosh etilgan, Andijonda 1,3 mlrd so‘mlik elektr energiyasidan noqonuniy foydalangan ishlab chiqarish sexi aniqlangani to‘g‘risida xabar berilgan edi.
Izoh (0)