Тошкент шаҳри ҳавоси ифлосланиш даражаси кеча, 27 январь куни соат 23:00 ҳолатига ўта ёмон ҳолатга келди. Ушбу жараён 28 январь куни тонгда ҳам давом этди.
Бугун тонгда Тошкент ҳавоси ифлос шаҳарлар рўйхатида 8-ўринни эгаллади. Пойтахт аҳолиси шаҳарда қандайдир куйган ҳид борлигидан шикоят қилди.
Бундай ҳолат кузатилишига бир қатор сабаблар, шу жумладан, пойтахт атрофини ҳар томондан ўраб олган минглаб иссиқхоналардан чиқаётган заҳарли ташламалар сабаб бўлаётгани айтилмоқда.
Иқлимшунос Эркин Абдулаҳатов иссиқхоналарнинг жойлашув харитасини эълон қилди.
“Шамол тезлиги паст ва камига шамол гули энди ҳар томондан шамолларни пойтахт ичига кириб келиш ёки чиқиб кетиш шароитида иссиқхоналардан чиқаётган заҳарли ташламаларнинг пойтахт ҳавасида муаллақ туриб қолишини тасаввур қилаверинг”, деб ёзади у.
Харитада Тошкент шаҳрининг шарқий қисмида эса иссиқхоналар камлигини кўриш мумкин.
“Яқин йилларда озиқ-овқат хавфсизлик масалаларини барқарорлаштиришда иссиқхона бизнеси учун ёз бўйи қишга пухта тайёргарликни кўриш чораларига эътибор қаратишимиз керак бўлади.
Ҳозир “арзимаган” газ ресурсларини иссиқхоналардан “қисиб”, биз кишилар саломатлиги билан боғлиқ ундан-да 10 баробар кўп иқтисодий зарарларни қабул қиляпмиз. Кишиларнинг бу об-ҳаво муҳитида ишлаш кайфияти ҳақида ортиқча нималарнидир ёзиб ўтириш шарт эмас менимча”, дея қўшимча қилади иқлимшунос.
Эркин Абдулаҳатов, шу билан бирга, Тошкентнинг шимоли-шарқий бурчаги “Янги Ўзбекистон боғи” ҳамда самолётдан кўриниши акс этган видеоларни улашди.
“Видеода смог ходисасини (заҳарли тутун аралашмали майда микроскопик ифлосланиш) кўриб турибсиз. Юқоридаги икки видео эҳтимолий кеча тасвирга олинган. Чунки кечаги об-ҳаво шароити пойтахтда шу каби ифлосланиш тарқалиши учун қулай муҳитни тақдим этган эди”, дея қўшимча қилган иқлимшунос.
Изоҳ (0)