Мюнхен марказида Mini Cooper автомобили Верди касаба уюшмаси намойиши иштирокчиларини босиб кетди. Бу ҳақда полицияга таяниб Bild хабар бермоқда.
Сўнгги маълумотларга кўра, ҳодиса оқибатида камида 27 киши жароҳатланган. Воқеа жойида фавқулодда хизматлар ишламоқда, жабрланганлар шифохоналарга етказилмоқда.
Полиция маълумотларига кўра, 13 февраль куни эрталаб соат тахминан 10:30 да ҳайдовчи Mini Cooper автомобилини Мюнхен марказида касаба уюшмалари намойишида иштирок этаётган бир гуруҳ одамларга қарата ҳайдаган. Bild’га маълум бўлишича, икки кишининг аҳволи оғир. Жабрланганлар орасида болалар ҳам борлиги айтилмоқда.
Полициячилар ҳайдовчи оломонга қасддан урилганми ёки газ ва тормоз педалларини адаштириб юборганлигига аниқлик киритмоқда. Автомобильни бошқарган шахс аллақачон қўлга олинган. Ҳодисадан олдин ўқ овозлари эшитилган, бироқ бу маълумотлар ҳозирча расман тасдиқланмаган.
Автомобильни бошқарган деб тахмин қилинаётган шахс қўлга олинган. У 24 ёшли Афғонистон фуқароси экани айтилмоқда.
Бу мамлакатда автомобилда содир этилган илк теракт эмас. 2024 йилнинг 21 декабрь куни Германиянинг Магдебург шаҳридаги Рождество ярмаркасида қора рангли BMW автомобили катта тезликда одамлар тўпланиб турган жойга бостириб кириши оқибатида 11 киши ҳалок бўлган, яна 60 киши жароҳатланган эди. Мазкур терактни содир этган шахс 50 ёшли асли саудиялик Толиб ал Абдулмуҳсин бўлиб, у 2006 йилда Германияга ўқиш учун келган. Ижтимоий тармоқларда Ислом динига қарши бўлган постлар ёзиб, Саудия Арабистони ҳукуматини танқид қилиб юрган.
Ўзининг ватани Саудия Арабистонида у терроризм, одам савдоси билан боғлиқ айбловлар билан қидирилмоқда. Германия ўз вақтида Абдулмуҳсинни саудияликларга экстрадиция қилишдан бош тортган.
Изоҳ (0)