Тошкент вилоятида 309,3 миллион сўмлик табиий газдан ўғринча фойдаланган иссиқхона аниқланди. Бу ҳақда “Ҳудудгазтаъминот” хабар берди.
Қайд этилишича, республиканинг барча ҳудудида табиий газ таъминотидаги ноқонуний ҳолатларни аниқлаш ва уларнинг олдини олишга қаратилган тадбирлар давом эттирилмоқда. Тошкент вилоятининг Қибрай туманида “Ҳудудгаз Тошкент” газ таъминоти филиали комплаенс назорат тузилмалари, туман газ таъминоти бўлими ходимлари ва ҳуқуқ-тартибот органлари ҳамкорлигида ўтказилган рейд жараёнида қонунбузилиш ҳолати фош этилди.
Туманнинг “Обод” МФЙда яшовчи фуқаро М.Р. ўз хонадонида иссиқхона ташкил қилиб, лойиҳа-техник ҳужжатларини расмийлаштирмасдан, табиий газ қувурига газ ҳисоблагичдан ташқари ўзбошимчалик билан тўғридан тўғри уланиб, зангори ёқилғидан ноқонуний фойдаланиб келган.
Ҳолат юзасидан далолатнома тузилиб, сарфланган табиий газ ҳажми қайта ҳисоб-китоб қилинди ва 309 миллион 348 минг сўмлик зарар аниқланди. Бу бўйича барча ҳужжатлар ҳуқуқни муҳофаза қилувчи органларга юборилди.
Газни ўғирлаётган оҳак цехлари
Март ойида Самарқанд вилоятининг Пахтачи туманида 4 млрд сўмлик табиий газдан ноқонуний фойдаланилган яширин оҳак цехи фош этилган эди. Апрелда эса Фарғонада 69,4 млн сўмлик табиий газдан ноқонуний фойдаланган оҳак цехи аниқланган.
Май ойида эса яна Фарғонада 289 млн сўмлик табиий газдан ноқонуний фойдаланиб, оҳак цехи ташкил этилганлиги аниқланган эди. Август ойида Самарқандда 3,3 млрд сўмлик табиий газдан ноқонуний фойдаланиб, оҳак цехи ташкил этган шахс ушланганди.
Сентябрда Фарғонада газдан ноқонуний фойдаланган оҳак цехи масъуллари давлатга 5,5 млрд сўмдан зиёд зарар етказди. Шу билан бирга, айнан Фарғона шаҳрида ноқонуний оҳак ишлаб чиқариш цехи ташкил қилиб, 544,6 млн сўмлик табиий газни ўғирлаганлар қўлга тушган эди.
Бундан ташқари, Самарқанддаги новвойхонада 621 млн сўмлик газдан ноқонуний фойдаланилди.
Газ ўғирлаётган иссиқхоналар
Тошкент вилоятида 618,4 миллион сўмлик табиий газдан ноқонуний фойдаланган иссиқхона аниқланганди. Шунингдек, Самарқандда 1 миллиард сўмлик табиий газдан ноқонуний фойдаланган иккита иссиқхона фош бўлгани тўғрисида хабар берилганди.
Изоҳ (0)