АҚШ суди хонанда Женнифер Лопес ва актёр Бен Аффлекнинг икки йил давом этган никоҳидан кейин ажримни расмийлаштирди, деб ёзади “Правила жизни” нашри. Собиқ эр-хотин молиявий масалалар бўйича келишувга эришди ва ортиқча суд ишларисиз ҳамда эътирозларсиз никоҳни бекор қилди.
Женнифер Лопес ва Бен Аффлекнинг ҳеч бири алимент тўламайди, актёр Аrtists Equity продюсерлик компаниясидаги улушини сақлаб қолади, Лопес эса ўз лойиҳаларини амалга оширишда давом этади.
Қайд этилишича, собиқ жуфтлик биргаликда харид қилган вилла борасидаги келишмовчиликлар ҳам бартараф этилган. Улар қандай келишувга келгани ҳозирча эълон қилинмаган.
Маълумки, 2023 йилда 60 миллион долларга харид қилинган ҳашаматли уй ҳозирда сотувга қўйилган. TMZ маълумотларига кўра, ҳозирча уйни олишга талабгорлар йўқ. Келгуси ойда суд ҳайъати ажримни тўлиқ маъқуллагач, Лопес Аффлек фамилиясидан расман воз кечади.
Жуфтликка яқин бўлган манбаларнинг сўзларига кўра, Бен Аффлек ва Женнифер Лопес тўйдан олдин никоҳ шартномаси тузмаган экан. Юлдузларнинг даражасига қараб, бунга ишониш қийин. Одатда бундай никоҳдан олдин бўлажак эр-хотин кўп саҳифали шартномалар тузишади. Аммо Аффлек ва Лопес нимагадир буни эътиборсиз қолдирган.
Дўстларининг сўзларига кўра, айнан Женнифер Лопес никоҳ шартномасини тузишда қатъий турмаган. Бу унинг тўртинчи никоҳи бўлгани учун Женнифер бу сафар ҳаммаси яхши бўлишига ишонган. Айниқса, Аффлек билан 20 йилдан бери таниш бўлганини инобатга олсак, бу вақт давомида улар бир-бирларини яхши билиб олишга улгурган. Аммо никоҳнинг биринчи йилидаёқ хонанда бу қароридан афсуслана бошлаган.
Юлдузли жуфтлик муносабатларининг тарихи 2002 йилга бориб тақалади, 2004 йилда улар никоҳдан ўтиши керак бўлади, аммо Лопес тўйни бир неча кун қолганда тўхтатади. Орадан қарийб йигирма йил ўтиб — 2021 йил июль ойида Лопес ва Аффлек яна бирга эканини тасдиқлади. 2022 йил 16 июлда эса жуфтлик муносабатларини расман қонунийлаштирди.
2024 йилнинг ёзида Лопес Аффлек билан ажрашиш учун ариза берган. Ариза судга 20 август куни тақдим этилган — айнан шу санада 2022 йилда Лопес ва Аффлек никоҳ маросимини ўтказган.
Актриса ажрашганидан кейин ҳам собиқ эридан моддий ёрдам олишдан бош тортган.
Изоҳ (0)