Голливуд юлдузлари ўтган йили бирга яшаш учун харид қилган ҳашаматли уйини сотувга қўйди, дея хабар бермоқда “Правила жизни” нашри.
Хусусан, жуфтликнинг Беверли Ҳиллсдаги кошонаси сотилаётгани ҳақидаги эълон Realtor.cоm порталида пайдо бўлди.
Бен ва Женнифер 12 та ётоқхона ва 24 та ҳаммомдан иборат мазкур хонадонни 2023 йил баҳорда 60 миллион долларга харид қилган ва уйни таъмирдан чиқарган эди. Эндиликда уйнинг нархи 68 миллион доллар дея баҳоланмоқда. Унинг майдони 3,5 минг метр квадрат бўлиб, боғи 21 минг метр квадратни ташкил этади.
Июнь ойининг бошида Аффлек ва Лопес умумий кўчмас мулкини интернетда эълон бермай сотишга уринди, бироқ харидор топилмагач, риэлторлик хизматларига мурожаат қилди. Бир нечта хорижий манбалар эр-хотин жуда қисқа вақт бирга яшагани ва расман ажримга тайёргарлик кўраётгани ҳақида ёзмоқда. Ҳозирда Женнифер Лопес Италияда дўстлари билан бирга дам олмоқда, Бен Аффлек эса Лос-Анжелесдаги хонадонларнинг бирини ижарага олган.
Женнифер Лопес ва Бен Аффлек 2001 йилда учраша бошлаган. Жуфтлик мухлислар ва оммавий ахборот воситаларида шу қадар машҳур эдики, уларни тез орада Беннифер деб атай бошлашди. Улар илк бор 2002 йилда унаштирилган, бироқ тўйни кейинга қолдиришга тўғри келган. 2004 йилда эса Лопес ва Аффлек ажрашишга қарор қилган. Юлдузлар 2021 йилда яна топишди, 2022 йил апрелида эса уларнинг унаштирилгани маълум бўлди.
Сотувга қўйилган уйни эр-хотин қарийб икки йил давомида танлаган ва шу вақт ичида улар 80 дан ортиқ вариантни кўриб чиққан.
Изоҳ (0)